Stórbrotið meistaraspjall: Tönnin á Aroni sprakk og gufaði í loft upp

ÍBV er Íslandsmeistari eftir öruggan sigur í leik fjögur í úrslitaeinvíginu við FH í Kaplakrika í dag. Nýkrýndir meistarar Kári Kristján Kristjánsson, Aron Rafn Eðvarðsson og Grétar Þór Eyþórsson settust við háborðið hjá Tómasi Þór Þórðarsyni í Seinni bylgjunni eftir leik og fögnuðu titlinum með stórbrotnu viðtali.

Þeir byrjuðu á því að ræða hinn fræga fögnuð Eyjamanna þegar Herjólfur siglir inn í höfnina undir flugeldasýningu og fagnaðarlátum og að Eyjamenn vinni titla á útivelli til þess að fá þann fögnuð.

„Settum bara í eina akademíska drullu í leik tvö og komum hingað og sóttum þetta. Yndislegt,“ sagði Kári Kristján sem hafði fyrr í útsendingunni sagt í viðtali við Guðjón Guðmundsson að ÍBV væri einfaldlega langbesta liðið.

„Já, verðum við ekki að segja það. Við vorum ekkert að rétt skríða yfir þetta í úrslitakeppninni, tökum þetta 8-1. Það er mjög sanngjarnt. Tökum deild sanngjarnt, bikar sanngjarnt, Íslandsmeistarar mjög sanngjarnt.“

Aron Rafn var kosinn besti leikmaður úrslitakeppninnar en hann var frábær í einvíginu gegn FH eftir að hafa hlotið mikla gagnrýni fyrr í vetur.

„Það var búið að hrauna yfir mig fyrir áramót og um að gera að svara því. Maður gerir það bara inn á vellinum,“ sagði Aron.

Aron varð fyrir óheppilegu atviki í leiknum í dag þegar Jóhann Birgir Ingvarsson þrumaði boltanum í andlitið á honum. Við það missti hann tönn.

„Jóhann Birgir ákvað að þruma einum þéttingsföstum í andlitið á mér og hún fór. Ég held hún hafi sprungið, hún gufaði upp.“

„Þetta verður lagað, engar áhyggjur,“ sagði þá Kári Kristján áður en Grétar Þór bætti við að það færi eftir því hvort hann semji áfram við ÍBV, annars myndi Heimir Hallgrímsson, landsliðsþjálfari Íslands í fótbolta og tannlæknir, ekki laga í honum tönnina.

Það var farið yfir ýmislegt fleira í þessu stórbrotna viðtali, meðal annars fær Kári Kristján þær fréttir að Aron Rafn sé í landsliðshóp og margt fleira. Allt viðtalið má sjá hér í fréttinni.