Nýársspá Siggu Kling – Vatnsberinn: Þarft að hafa minna fyrir því á þessu ári af afla peninga

Elsku Vatnsberinn minn, það hefur aldrei gerst áður að þú sért síðasta merkið sem ég spái fyrir, því það er eitthvað svo auðvelt að skoða þitt merki með þína miklu aðlögunarhæfileika. Á þessu ári gerist lífið svolítið hratt og ef þú þráir eitthvað nógu heitt gætirðu freistast til að framkvæma af hvatvísi án þess að sálin og sannfæringin fylgi með.

Ef það væri hægt að segja að viss merki væru eins og sál værir þú svo svakalega gömul sál og mikill friðarsinni, svo ef hvatvísi þín kveikir á óróleika og öfund, þá þarftu að taka tvö skref til baka til að koma jafnvægi aftur á, svo hugsaðu þig því tvisvar um og settu þig ekki í fyrsta sæti að þessu sinni, heldur horfðu á heildarmyndina.

Þetta er skemmtilegt ár og talan fimm sem er lífstalan mín er við hlið þér, svo þetta ár tengir þig við litríka hluti og fegurð. Fyrstu þrír mánuðirnir gera vissa kröfu um rólegheit, það að slaka bara svolítið á, en síðan fer allt á flug og þú sérð að þú ert svo sannarlega á Saga Class.

Ég veit þú þolir ekki stöðnun og vilt rugga bátnum til að lífið sé meira spennandi, en slík spenna dugar bara stutta stund og á þessum mánuðum sem eru að mæta þér munt þú hjálpa öðrum að ná sínum markmiðum, því þér finnst sælla að gefa en þiggja og þannig munt þú einnig ná góðri stjórn á skipi þínu og áhöfn. Þú hefur stórfenglega útgeislun og þarft að eiga góða návist við sjálfan þig, karma eða Föken Karma sem er að færa þér gjafir þegar sumarið siglir inn, og þá sérðu að þú hefur náð meiri árangri en þú bjóst við og skynjar betur tilgang og gjafir lífsins.

Þú virðist þurfa að hafa minna fyrir því á þessu ári af afla peninga, veraldleg velferð streymir til þín og þú munt elska að gefa öðrum það sem þú getur svo þessi orka virðist endalaus. Þetta ár fær þig til að skoða hin ýmsu trúarbrögð, hefðir og venjur og þér mun finnast þú þroskist á hraða eldingarinnar vegna þess þú finnur sannleikann.

Frægir Vatnsberar: Pacas hans Begga, Geir Sveinsson handknattleiksþjálfari, Halla himintungl, Clark Gable leikari, Sveinbjörg Birna Sveinbjörnsdóttir borgarfulltrúi, Yoko Ono, Bjarni Benediktsson, fjármála- og efnahagsráðherra, Katrín Jakobsdóttir þingkona, Hilmir Snær Guðnason leikari, Rikka sjónvarpskona, María Ólafsdóttir Júróvisjónstjarna, Þóra Arnórsdóttir, ritstjóri Kastljóss, Gunna Dís útvarpskona, Höddi Magg, Andrea Róberts mannauður, Hilmar Hafsteinsson ofurfasteignasali, Rut Roberts flugfreyja hjá Icelandair, Ragnheidur Guðfinna sálfræðingur.