Nýársspá Siggu Kling – Sporðdrekinn: Gefur þér litríki og miklu fleiri tækifæri

Elsku Sporðdrekinn minn, þú ert að fara á margfalt betra ár en það síðasta var þér og þó það hafi verið erfitt lagði það góðar undirstöður fyrir þetta nýja ár, svo vertu þakklátur fyrir það.

Hver mánuður sem líður af þessu nýja og spennandi ári, sýnir þér þú hefur kraft til að móta það sem þú vilt í sálinni þinni, sem gefur þér meiri bjartsýni og lætur þig sjá að erfileikarnir sem hafa hamlað þér áður verða svo góður grunnur og láta þér líða svo miklu betur. Þetta fær þig til að finna fyrir meira öryggi sem er er rauði þráðurinn í lífi þínu, þú tekur enga áhættu nema öryggi bjóði upp á það.

Talan fimm fylgir þér á þessu ári og gefur þér litríki og miklu fleiri tækifæri til að hlægja, gleðjast og finna öryggi. Í janúar muntu svo vel finna að þú ert elskaður, mars færir þér uppfyllingu óska þinna, eitthvað sem þú hefur hugsað í töluverðan tíma og sumarið gefur þér mörg tilefni til að leika þér, fara í fleiri partý og trúa því að heimurinn sé leikvöllurinn þinn og þú ræður í hvaða leikjum þú tekur þátt.

Ég vil benda þér á að segja já við óvenjulegum hlutum og viðburðum, taka þig svolítið upp á hnakkadrambinu og kasta þér út í hið óvænta, eitthvað sem þú hefðir ekki séð sjálfan þig gera fyrir ári síðan.  Undirvitund þín er svo afskaplega næm og þú átt eftir að vera eins og spámaður, sérð fyrir þér hluti, þig dreymir sterkt og það er svo stórkostlegt með drauma að fólki hefur dreymt nákvæmlega fyrir smáatriðum næstu daga, og kallast það að dreyma fyrir daglátum.

Það er mikilvægt fyrir þig að skrifa draumana þína niður, því þá eflirðu þá vitund í skynjun þinni og þig dreymir þar af leiðandi meira, betur og skýrar sem gefur þér fleiri möguleika á að leysa úr þeim verkefnum sem mæta þér. Dagdraumar, eða það sem gerist þegar þú dettur út og lætur hugann reika eru bara byggðir á svipaðri orku og draumarnir sem þú færð á nóttunni, og þar sem talan fimm fléttast inn í líf þitt þetta árið þá færðu fleiri svör við spurningum þínum.

Þetta ár gefur þér færi á svo mörgum tilraunum og nýjungum og orðið mistök er ekki til. Thomas Alva Edison gerði 4900 tilraunir áður en hann fann ljósið upp og ekkert af þessum tilraunum voru mistök, það sama á við um þig, þú ert á leiðinni að mynda hamingjuna á ljóshraða, efla sjálfan þig og þá mun kveikna á perunni. Vorið, sumarið og haustið virðast eins og ein heild í góðri bíómynd sem þú verður ánægður með og það hlutverk sem þú hefur valið að leika í. Þú ert svo hreinskilinn og talar beint frá hjartanu, en þannig er það bara og hverjum er ekki sama? Því þeir sem skilja þig og þekkja vita þú ert einstök týpa, storkar flestum og ert þess vegna eins og jólapakkinn sem enginn bjóst við að fá.

Frægir Sporðdrekar: Birkir Már Sævarsson landsliðsmaður, Dísa í World Class, Helga Braga Jónsdóttir leikkona, Björk Guðmundsdóttir söngkona, Scarlett Johansson leikkona, Whoopie Goldberg leikkona, Sigríður Elva Vilhjálmsdóttir sjónvarpskona, Emmsjé Gauti rappari, Björk, Indira Ghandi, Karl bretaprins, Hillary Clinton, Leonardo DiCaprio, Magnús Scheving, Steingrímur Sævarr Ólafsson fjölmiðlaráðgjafi, Guðný Hrefna Sverrisdóttir, flugfreyja og gourmé kokkur, Hörður Ágústsson Macland snillingur, Indira Gandhi, Guðrún Ásmundsdóttir og Calvin Klein.