Þingmenn ræða ákærur gegn Trump fram á kvöld

Fulltrúadeild Bandaríkjaþings mun í kvöld greiða atkvæði um það hvort samþykkja eigi ákærurnar tvær gegn Donald Trump, forseta, fyrir embættisbrot. Fyrst munu þó umræður eiga sér stað en niðurstaðan hefur legið fyrir um nokkuð skeið. Miðað við yfirlýsingar þingmanna hingað til styður meirihluti þeirra ákærurnar en atkvæðagreiðslan mun að öllum líkindum fylgja flokkslínum.

Það fyrsta sem gerðist þegar umræðan hófst var að Repúblikanar lögðu fram tillögu um að þingfundi yrði frestað í dag. Það var ekki samþykkt og Repúblikanar vissu að það yrði ekki samþykkt. Það næsta sem Repúblikanar gerðu var að leggja fram ályktun um að Demókratar hafi brotið reglur þingsins við rannsókn þeirra á meintum brotum Trump.

Líklegt þykir að dagurinn muni að miklu leyti snúast um tafir og formsatriði.

Sjá einnig: Þingmenn sem standa höllum fæti styðja ákærurnar gegn Trump

Að deginum loknum verður Trump þriðji forsetinn sem hefur verið ákærður fyrir embættisbrot í sögu Bandaríkjanna.

Ekki liggur fyrir hvenær atkvæðagreiðslan mun fara fram en fylgjast má með þinginu og umfjöllun PBS Newshour hér að neðan. Atkvæðagreiðslan fer að öllum líkindum ekki fram fyrr en seint í kvöld.

Tvær ákærur

Demókratar hafa opinberað tvær ákærur gegn Donald Trump, forseta Bandaríkjanna, fyrir embættisbrot. Hann er sakaður um að misnota vald sitt og að standa í vegi þingsins varðandi rannsókn fulltrúadeildarinnar.

Trump er gert að hafa beitt utanríkisstefnu Bandaríkjanna gagnvart Úkraínu með því markmiði að þvinga Volodymyr Zelensky, forseta Úkraínu til að tilkynna upphaf tveggja rannsókna sem myndu nýtast Trump í kosningunum á næsta ári. Sú viðleitni hafi staðið yfir um mánaða skeið og hafi verið stýrt af Rudy Giuliani, einkalögmanni Trump.

Meðal annars stöðvaði Trump afhendingu tæplega 400 milljóna dala neyðaraðstoðar til Úkraínu, sem þingið hafði samþykkt. Þá var fundur Zelensky og Trump, sem Zelensky sóttist eftir, skilyrtur því að forsetinn úkraínski tilkynnti tvær rannsóknir sem koma Trump vel fyrir kosningarnar á næsta ári.

Sjá einnig: Sluppu með naumindum við að verða við kröfum Trump

Demókratar segja Trump hafa ógnað bæði heilindum kosninga í Bandaríkjunum og þjóðaröryggi en rannsókn hefur nú staðið yfir frá því að í ljós kom að Trump hafði haldið aftur af neyðaraðstoðinni til Úkraínu. Vitni og aðrir segja það hafa verið gert til að þrýsta á Volodymyr Zelensky, forseta Úkraínu.

Trump hafði krafið Zelensky um að tilkynna opinberlega að hann ætlaði að hefja tvær rannsóknir sem myndu nýtast Trump fyrir kosningarnar á næsta ári. Á því byggir ákæran um að Trump hafi misnotað vald sitt.

Þá meinaði forsetinn starfsmönnum ríkisstjórnar sinnar að bera vitni og neitaði að afhenda gögn sem þingið krafðist. Á því byggir kæran um að Trump hafi staðið í vegi þingsins.

Lítið til í ásökunum Trump

Forsetinn og bandamenn hans hafa sakað Joe Biden um spillingu vegna þess að hann þrýsti á úkraínsk stjórnvöld að reka saksóknara á sama tíma og Hunter, sonur hans, sat í stjórn olíufyrirtækisins Burisma Holdings. Það eigi Biden að hafa gert til að stöðva rannsókn sem beindist að Burisma, samkvæmt kenningu Trump-liða og vill forsetinn að Úkraínumenn rannsaki það.

Ekkert hefur þó komið fram sem bendir til þess að Biden-feðgarnir hafi gert nokkuð ólöglega eða að rannsókn hafi yfir höfuð staðið yfir á Burisma á þeim tíma sem þáverandi varaforsetinn reyndi að koma saksóknara frá. Sú viðleitni var hluti af alþjóðlegum þrýstingi þar sem vestræn ríki töldu saksóknarann ljón í vegi þess að uppræta langvarandi spillingu í Úkraínu.

Hin rannsóknin tengist samsæriskenningu um tölvupóstþjón landsnefndar Demókrataflokksins sem rússneskir hakkarar brutust inn í fyrir forsetakosningarnar 2016 og láku vandræðalegum póstum í gegnum Wikileaks. Trump hefur lengi verið gramur vegna niðurstöðu bandarísku leyniþjónustunnar að rússnesk stjórnvöld hafi háð upplýsingastríð og framið tölvuinnbrot til að hjálpa honum til sigurs.

Trump og bandamenn hans hafa því haldið þeirri hugmynd á lofti um að það hafi í reynd verið úkraínskir útsendarar sem frömdu innbrotið í tölvupóstþjón demókrata og að þeir hafi bókstaflega falið áþreifanlegan tölvupóstþjón í Úkraínu. Markmiðið hafi verið að koma sök á Rússa. Það er, eins og áður hefur komið fram, þvert á öll sönnunargögn og niðurstöður öryggisstofnanna í bandaríkjunum og sérfræðinga.

Þessu hafa Trump-liðar og þar með taldir nokkrir þingmenn, haldið áfram að dreifa. Þrátt fyrir að embættismenn og forsvarsmenn öryggisstofnanna hafi varað þá við því að ásakanirnar gegn Úkraínu séu runnar undan rifjum þeirra sömu Rússa og gerðu árásina á tölvukerfi Landsnefndar Demókrataflokksins.

Málið snýst í rauninni ekki um það hvort Trump hafi gert það sem hann er sakaður um. Þar er enginn vafi á. Málið snýst um það hvort það sé nægjanlegt tilefni til að vísa forseta úr embætti. Í fyrstu virtust þó nokkrir Repúblikanar vera þeirrar skoðunar að forseti ætti ekki að haga sér svona en það hefur breyst.