Þrír metnir hæfastir um lausa stöðu dómara við Hæstarétt
Þrír umsækjendur af þeim átta sem sóttu um lausa stöðu dómara við Hæstarétt hafa verið metnir hæfastir til að gegna stöðunni.
Frá þessu greinir í Fréttablaðinu í morgun að þau þrjú sem hæfust þyki séu Ingveldur Einarsdóttir, Davíð Þór Björgvinsson og Sigurður Tómas Magnússon. Þau eru öll dómarar við Landsrétt.
Þá segir að þau sem sóttu um hafi fengið erindi þess efnis frá dómnefndinni en frestur til að gera athugasemdir við matið rann út á föstudag.
Tveir dómarar við Hæstarétt hafa tilkynnt ráðherra um að þeir hyggist hætta sökum aldurs, en það eru þeir Markús Sigurbjörnsson og Viðar Már Matthíasson.
Aðeins verður þó einn skipaður í þeirra stað sökum þess að ákveðið hefur verið að fækka dómurum við réttinn.
Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.
