Innlent

Spasskí og Fischer á sviði í London með Guðmundi G. og Sæma Rokk

Kristján Már Unnarsson skrifar
Guðmundur G. Þórarinsson við Laugardalshöll í dag. Hann var forseti Skáksambands Íslands árið 1972 þegar heimsmeistaraeinvígið fór fram. Minningarskjöld um atburðinn má sjá á súlunni fyrir aftan.
Guðmundur G. Þórarinsson við Laugardalshöll í dag. Hann var forseti Skáksambands Íslands árið 1972 þegar heimsmeistaraeinvígið fór fram. Minningarskjöld um atburðinn má sjá á súlunni fyrir aftan. Stöð 2/Egill Aðalsteinsson.

Þeir Spasskí og Fischer eru aðalpersónurnar í nýju leikriti um skákeinvígi aldarinnar, sem frumsýnt hefur verið í London, um atburði sem gerðust í Reykjavík fyrir nærri hálfri öld. Athygli vekur að tveir Íslendingar, þeir Guðmundur G. Þórarinsson og Sæmi rokk, eru leiknar persónur í leikritinu. Þetta mátti sjá í fréttum Stöðvar 2.

Kynningarspjald fyrir leikritið. Þeir Ronan Raftery og Robert Emms leika Spasskí og Fischer.Mynd/Hampstead-leikhúsið.

Verkinu er lýst sem sálfræðitrylli byggðum á raunverulegum atburðum þegar augu heimsins beindust að Reykjavík sumarið 1972. Og það var ekki bara allt undir hjá þeim Boris Spasskí og Bobby Fischer heldur tókust á stórveldin tvö í kalda stríðinu, sem sáu einvígið sem vettvang til að sýna fram á hugmyndafræðilega yfirburði.

Persónur og leikendur. Nöfn Íslendinganna eru rituð með íslenskum stöfum í leikskránni.Myndir/Hampstead-leikhúsið.

Leikritið ber heitið Ravens: Spassky vs. Fischer og var frumsýnt þann 28. nóvember í Hampstead-leikhúsinu. Höfundurinn er Tom Morton-Smith sem skóp sér nafn fyrir leikrit sitt um Oppenheimer, föður kjarnorkusprengjunnar. 



Aðalpersónur leikritsins eru auðvitað Spasskí og Fischer, leiknir af þeim Ronan Raftery og Robert Emms, sem margir kannast við úr bíómyndum eins Jurassic World og Spielberg-myndinni War Horse. 



Athygli vekur að tvær íslenskar persónur eru í verkinu. Forseta Skáksambands Íslands, Guðmund G. Þórarinsson, leikur Gunnar Cauthery. Gunnar á íslenska móður en hans fyrsta kvikmyndahlutverk var í Benjamín dúfu. Einkalífvörð Fischers, Sæmund Pálsson, Sæma rokk, leikur Gary Shelford.



Við Laugardalshöllina þar sem heimsmeistaraeinvígið fór fram spurðum við Guðmund hvort hann hafi vitað um að hann væri orðin persóna í leikriti í London: 



„Ja, það var einhver sem hringdi í mig. Ég hélt að þetta væri grín. En það getur ekki verið að ég sé merkileg persóna þarna.“ 



-En þér var ekki boðið á frumsýninguna? 



„Nei, nei. En þetta sýnir hvað þetta einvígi endalaust vekur áhuga manna,“ svarar Guðmundur.

Sæmi Rokk við taflborðið, en hann var lífvörður Fischers meðan á einvíginu stóð og síðar góðvinur stórmeistarans.Vísir/teitur

„Núna eru þetta bráðum fimmtíu ár. Fischer deyr 2008. Og samt eru menn enn að koma og sjónvarpsstöðvar að fá viðræður um hann og einvígið náttúrlega. Spassky er kominn í hjólastól, fékk heilablóðfall og býr í Moskvu núna,“ segir Guðmundur.



Meðan leikhús Lundúna eru innblásin af skákeinvíginu, - svo var einnig um söngleikinn Chess, - er lítill sköldur á vegg það eina við Laugardalshöll sem minnir á þennan heimsviðburð. Guðmundi skilst þó að menntamálaráðherra sé að undirbúa minnismerki. 



„Sem yrði þá einhversstaðar hérna. En svona minnismerki ætti að vera óður til skáklistarinnar,“ segir Guðmundur G. Þórarinsson. 



Hér má sjá frétt Stöðvar 2:


Tengdar fréttir

Kasparov heimsækir leiði Fischers

Fimmtugasta Reykjavíkurskákmótið hefst í Hörpu í dag og stendur yfir til 12. mars. Í tilefni afmælisins verða ýmsar uppákomur.

Sæmi Rokk fær að heita Sæmi Rokk

Leikarinn, dansarinn, lífvörðurinn og fyrrverandi lögreglumaðurinn Sæmundur Pálsson, betur þekktur sem Sæmi Rokk - fær framvegis að heita Sæmi Rokk.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.