Innlent

Yfir­lög­reglu­þjónn á Norður­landi vestra: „Vitum illa á hverju við eigum von öðru en því að þetta verður kol­vit­laust veður“

Sunna Kristín Hilmarsdóttir skrifar
Rauð viðvörun tekur gildi á Norðurlandi vestra og Ströndum klukkan 17 á morgun. Appelsínugular viðvaranir verða í gildi annars staðar á landinu.
Rauð viðvörun tekur gildi á Norðurlandi vestra og Ströndum klukkan 17 á morgun. Appelsínugular viðvaranir verða í gildi annars staðar á landinu. veðurstofa íslands

Stefán Vagn Stefánsson, yfirlögregluþjónn hjá lögreglunni á Norðurlandi vestra, segir að undirbúningur lögreglu fyrir óveðrið sem skellur á í fyrramálið hafi gengið þokkalega.

Því er spáð að veðrið verði verst á Ströndum og Norðurlandi vestra; appelsínugul veðurviðvörun tekur gildi strax í fyrramálið en verður svo að rauðri viðvörun klukkan 17 sem er í gildi til klukkan eitt aðra nótt.

Í færslu á Facebook-síðu lögreglunnar á Norðurlandi vestra kemur fram að Almannavarnarnefndir Skagafjarðar og Húnavatnssýslna hafi lokið fundi vegna yfirvofandi óveðurs.

Þær líti málið alvarlegum augum, enda sé þetta í fyrsta skipti hérlendis gefin út rauð viðvörun vegna veðurs.

Veðrið gæti orðið einna verst í Hrútafirði

„Ég held við séum búnir að koma okkur eins mikið í startholurnar og við getum. Við vitum illa á hverju við eigum von öðru en því að þetta verður kolvitlaust veður. En nákvæmlega hvernig og hvar það slær okkur verst vitum við náttúrulega aldrei,“ segir Stefán í samtali við Vísi.

Aðspurður hvort lögregla og viðbragðsaðilar geri ráð fyrir, samkvæmt upplýsingum frá Veðurstofu Íslands, hvort að veður verði verra en annars staðar á einhverjum tilteknum stað í umdæminu nefnir Stefán Hrútafjörðinn.

„Við tökum á móti þessu, það er alveg ljóst, og fáum þetta svolítið í fangið Strandir og Norðurland vestra. Samkvæmt upplýsingum frá veðurfræðingum þá sýnist okkur kannski að veðrið geti orðið einna verst í Hrútafirði og þar nálægt á Ströndum. Það er strengur þar inn í Hrútafjörðinn, ef þetta veður gengur eftir eins og því hefur verið spáð, þá höfum við áhyggjur af því svæði. Svo er veðurhæðin miðað við þessar spár svo gríðarleg á öllu svæðinu að þetta verður vonskuveður og vonandi bara sleppur þetta til.“

„Getur orðið mjög erfitt fyrir viðbragðsaðila að sinna útköllum“

Allt skólahald fellur niður í umdæminu á morgun og þá verða öll íþróttamannvirki lokuð. Rafmagn gæti raskast vegna veðursins og sjávarmál verður í hærra lagi.

Elín Björk Jónasdóttir, veðurfræðingur, sagði í samtali við Vísi fyrr í kvöld að rauð viðvörun þýddi mjög mikilvæg samfélagsleg áhrif á því svæði sem hún tæki til. Veðrið stæði lengur yfir og landshlutinn gæti einangrast, það er að veður verði svo slæmt að ekki verði hægt að koma fólki til aðstoðar ef eitthvað gerist.

Hvernig eru þið lögreglan að undirbúa ykkur fyrir þetta? Að komast mögulega ekki til fólks hlýtur að vera erfið staða fyrir viðbragðsaðila?

„Þetta er mjög snúið. Það er eins og við segjum þarna á síðunni, við þurfum að gera fólki grein fyrir að það getur orðið mjög erfitt fyrir viðbragðsaðila að sinna útköllum. Það getur komið til þess, við vonum að það geri það ekki, en það getur komið til þess að við þurfum hreinlega að forgangsraða okkar verkefnum,“ segir Stefán.

Þá hafi lögreglan verið í samtali við verktaka og snjómokstursmenn- og konur sem ætla að aðstoða lögreglu og aðra viðbragðsaðila á morgun ef það þarf að sinna einhverjum bráðaútköllum.

„Þá erum við með svona tæki með okkur til að koma okkur á staðinn í þessi alvarlegri útköll. En annars treystum við á tæki björgunarsveitanna.“

Stefán Vagn segir veðrið þannig að fólk eigi að vera heima hjá sér og ekki fara út að óþörfu.

„Því það getur náttúrulega skapað þá auka hættu og auka álag á viðbragðsaðilana ef það eru fleiri á ferli, fleiri fastir og fleiri í vandræðum. Þannig að helst vildum við hafa sem flesta heima hjá sér og minnka álagið á kerfið,“ segir Stefán.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.