Reka sig á sömu veggi
Samtök fyrirtækja í velferðarþjónustu, Samtök heilbrigðisfyrirtækja, Félag sjúkraþjálfara, Tannlæknafélag Íslands og Læknafélag Reykjavíkur fólu KPMG að gera úttekt á starfsumhverfi þjónustuveitenda í heilbrigðisþjónustu og voru niðurstöðurnar kynntar í dag. „Það eru ýmsir annmarkar í fyrirkomulaginu hvað varðar samninga og útboð á þjónustu sem að við erum að benda á í skýrslunni, margt sem betur má fara í því umhverfi,“ segir Svanbjörn Thoroddsen, stjórnarformaður KPMG á Íslandi.„Það óvissa um hvað skuli gert, það er ekki nógu vel staðið að því að semja. Samningar sem eru gerðir núna eru margir hverjir afar stuttir, það er verið að framlengja óvænt í stuttan tíma í einu, það er verið að breyta um fyrirkomulag og fleira,“ segir Svanbjörn.
Fyrrnefndir aðilar eru stærstu viðsemjendur ríkisins við sjúkratryggingar við kaup á heilbrigðisþjónustu. „Þessir aðilar alla veganna voru komnir einhvern veginn út við vegg, út í horn, í sínum samskiptum við ríkið um þessa þjónustu,“ segir Eybjörg Hauksdóttir, framkvæmdastjóri Samtaka fyrirtækja í velferðarþjónustu. „Hjúkrunarheimilin hafa verið þjónustusamningslaus frá því um síðustu áramót, sjúkraþjálfarar eru núna búnir að segja sig af samningi, þjónustusamningi sem að var í gildi gagnvart Sjúkratryggingum Íslands, það bara var í dag og viðræður þar hafa ekki gengið. Læknafélagið, þar hafa viðræður líka ekki gengið,“ nefnir Eybjörg sem dæmi.
Ósátt við samráðsleysi við SÍ
María Heimisdóttir, forstjóri Sjúkratrygginga Íslands segist enn ekki hafa séð skýrsluna sem kynnt var í dag. „Það er mjög margt í þessu sem að er sambærilegt við það sem ríkisendurskoðun sagði í sinni skýrslu 2018 og kemur manni þess vegna ekki á óvart. Svo er það auðvitað líka þannig að margt í þessari skýrslu er þannig að það er algjörlega hægt að hafa tvær skoðanir eftir því hvort maður situr hérna meginn, eða hérna meginn við borðið,“ segir María.„Okkur hefði þótt frábært að fá að taka þátt í samtalinu en það var sem sagt ákveðið að hafa þetta aðeins frá sjónarhóli annars aðilans.“
Tilkynnti meint verðsamráð til samkeppniseftirlitsins
Félag sjúkraþjálfara segir farir sínar heldur ekki sléttar af samskiptum við SÍ. Fyrir helgi sögðu sjálfstætt starfandi sjúkraþjálfarar sig frá samningi við sjúkratryggingar því þeir kváðust ekki vilja starfa eftir útrunnum rammasamningi. Þá hafa sjúkratryggingar tilkynnt félagið til samkeppniseftirlitsins vegna gruns um brot á samkeppnislögum um ólögmætt verðsamráð.„Við fengum upplýsingar um það að félagið hefði sent sínum félagsmönnum eigin gjaldskrá, það er að segja bara gjaldskrá félagsins, og við höfum áhyggjur af því að þetta kunni að stangast á við samkeppnislög og þetta kunni sem sagt að vera verðsamráð, og við vísum því bara til til þess bæra aðila,“ segir María.
Sjá einnig: Formaður Félags sjúkraþjálfara: „Þetta eru alvarlegar ávirðingar sem á okkur eru bornar“
Formaður Félags sjúkraþjálfara andmælti þessu í hádegisfréttum Bylgjunnar í dag og sagði um að ræða „alvarlegar ávirðingar“ sem sjúkratryggingar væru að bera upp á félagið. Enginn fótur sé fyrir því að félagið hafi gefið út slíka verðskrá. María kveðst aðspurð ekki hafa vitað af þessari afstöðu félagsins þegar innt var eftir viðbrögðum við þessu. „Ég veit bara það að við vorum upplýst um að félagið hefði sent félagsmönnum sínum nýja gjaldskrá sem að þau hefðu sett án nokkurs samráðs við okkur. Og það eina sem við getum gert er þá að kalla til samkeppniseftirlitið og við skulum bara sjá hvað kemur út úr því. En ef að þetta er ekki rétt nú þá hefur formaður félagsins væntanlega engu að kvíða,“ segir María.
