Viðskipti innlent

Mikilvægt að fyrirtæki velji fjölbreyttan hóp samstarfsaðila

Sylvía Rut Sigfúsdóttir skrifar
Birgitta Líf Björnsdóttir markaðsstjóri World Class segir að örfáir "áhrifavaldar“ séu á styrk hjá fyrirtækinu.
Birgitta Líf Björnsdóttir markaðsstjóri World Class segir að örfáir "áhrifavaldar“ séu á styrk hjá fyrirtækinu. Mynd/Instagram

Markaðsstjóri World Class segir þá einstaklinga sem hljóti styrki hjá líkamsræktarstöðinni þurfa að vera heilbrigða, flotta og geta verið góðar fyrirmyndir.

„Og stundi heilsurækt eða noti sér aðstöðu World Class af kappi,“ segir Birgitta Líf Björnsdóttir markaðsstjóri World Class í samtali við Vísi.

„Við höfum verið lengi að vinna með flestum þeim sem við erum að styrkja, bæði þá liðum og einstaklingum. Við reynum eftir fremsta megni að styrkja eða styðja við þá sem hafa samband við okkur og erum lítið að leita eftir slíku sjálf, þá er ég að tala um íþróttalið og afreksíþróttafólk. Hópurinn sem við erum að styrkja er stór og fjölbreyttur og úr flestum íþróttum.“

Afreksíþróttafólki blöskrar styrkir til „áhrifavalda í meðallagi“

Twitter færsla Sólveigar Bergsdóttur um styrki heilsufyrirtækja til áhrifavalda hefur vakið mikla athygli síðustu daga. Sólveig segir að afreksíþróttafólk eigi erfitt með að fá styrki eftir að áhrifavaldar á samfélagsmiðlum urðu áberandi á Íslandi.

Íþróttafólk úr nokkrum greinum tók undir skrif Sólveigar Bergsdóttur um styrki til íþróttafólks og áhrifavalda. Úr einkasafni

„Ég, landsliðskona í fimleikum og afreks íþróttakona, á erfiðara með að fá vörustyrki og/eða samstarf við heilsutengd fyrirtæki en áhrifavaldur í meðallagi á Íslandi. Skekkja? Fleira íþróttafólk sem tengir?“ skrifaði Sólveig og fleiri íþróttamenn tóku undir.

„Þetta er náttúrulega bara matsatriði hjá mér en mér finnst að þegar ég er kannski að horfa á stelpur sem eru bara í ræktinni, sem eru á styrkjum hjá heilsu- og íþróttafyrirtækjum, þá hugsar maður: „Af hverju gátu þeir ekki styrkt íþróttamann í staðinn?“ Ég hef verið að fylgjast með þessu á samfélagsmiðlum og finnst þetta frekar algengt,“ segir Sólveig í samtali við Vísi.

World Class er langstærsti aðilinn á markaði þegar kemur að líkamsræktarstöðvum. Fimmtán stöðvar og plön um fleiri.

Örfáir „áhrifavaldar“ á styrk hjá World Class

„Ég get ekki talað fyrir hönd annarra en World Class og þar er þetta ekki raunveruleikinn enda erum við dugleg að styðja við íþróttafólk eins og við getum. Það er leiðinlegt að heyra að þetta sé staðan og mikilvægt að fyrirtæki setji sér skýra stefnu í þessum málum og reyni að hafa samstarfsaðila sína fjölbreyttan hóp,“ segir Birgitta Líf um færslu Sólveigar. 

Hún segir að World Class styrki að mestu leiti íþróttalið og afreksíþróttafólk.
„Áhrifavaldar sem vinna með okkur er hægt að telja á fingrum annarrar handar og er það þá helst í tengslum við sér verkefni.“

Hafði ekki sömu áhrif

Svavar Jóhannsson framkvæmdarstjóri Fitness Sport sagði í samtali við Vísi í gær að fyrirtækið velji frekar lífsstílssnappara en afreksíþróttafólk til að vinna með, því þeirra markhópur tengi betur við þannig einstaklinga. „Við höfum frekar einblínt á lífsstílssnappara þar sem okkar markhópur er venjulegt fólk sem getur tengt við viðkomandi aðila og hans daglega líf.“

Fitness Sport er eitt af þeim fyrirtækjum sem eru í samstarfi við marga áhrifavalda. Á síðu þeirra má sjá marga lífsstílsbloggara, einkaþjálfara og fyrrum fegurðardrotningar.  Áherslurnar voru þó aðrar hjá fyrirtækinu á árum áður og fyrirtækið vann þá með fleiri einstaklingum úr hópi afreksfólks.

„Okkur fannst við ekki ná sama árangri með að koma skilaboðum til þeirra sem við vildum ná til.“

Styrkirnir snúast um ímynd

Birgitta Líf segir að World Class skoði ekki hvaða áhrif styrkir og samstarf við einstaklinga og lið hafi á hagnað eða sölutölur.
„Við mælum það ekki, heldur snúast styrkirnir um ímynd fyrirtækisins út á við, að ýta undir heilsu landsmanna og styðja við íþróttahreyfingar landsins og afreksfólkið okkar.“
Hún segir að fyrirtækinu finnist mjög jákvætt að geta styrkt á þennan hátt.

„Við setjum aldrei kröfur um auglýsingar og viljum að þeir sem við styrkjum séu raunverulega að njóta góðs af samstarfinu og nýti sér þá þjónustu og aðstöðu sem við höfum upp á að bjóða. Það smitar þá sjálfkrafa út frá sér ef aðilinn er ánægður og enn skemmtilegra ef því er deilt áfram, hvort sem það er á samfélagsmiðlum eða bara í kringum einstaklinginn.“

Birgitta Líf Björnsdóttir markaðsstjóri World Class og Instagram áhrifavaldur. Mynd/Aðsent

Birgitta Líf segir að fyrirtækið sé í augnablikinu að styrkja tugi einstaklinga og íþróttaliða.

„Við erum að styrkja fjöldann allan af íþróttaliðum og íþróttafólki úr alls kyns íþróttum á einn eða annan hátt. Þar koma lið og fólk úr sundi, fótbolta, handbolta, mótorkrossi, fimleikum, bogfimi, badminton, krossfit og fleira svo eitthvað sé nefnt og er það í tugum talið. 

Við styrkjum einnig mikið af listafólki, leikurum og söngvurum sem dæmi.“

Stjórnar sjálf hvað hún setur inn

„Áhrifavaldar sem við vinnum með í tengslum við ákveðin verkefni geta talist á fingrum annarrar,“ segir Birgitta Líf. Þó að það sé eitthvað um það að sjálfstætt starfandi einkaþjálfarar styrki aðila til að auglýsa sína þjónustu.

„En það er ekki á okkar vegum.“

Birgitta Líf þekkir líka hina hliðina á þessu máli en sjálf er hún persónulega með yfir 20.000 fylgjendur á Instagram og styrktarsamninga við nokkur fyrirtæki. Hún segist hafa unnið með þeim öllum í tæp þrjú ár. Birgitta Líf er meðal annars með samning við Nocco, 66 gráður norður, Moët & Chandon og Nike á Íslandi.

„Þau fyrirtæki sem ég vinn með hef ég unnið með í langan tíma og eru allt vörumerki sem passa vel inn í mitt daglega líf, ég hef notað lengi og á í góðum samskiptum við. Ég er sjálf í fullu starfi í vinnu og lít því alltaf á Instagram eða allt því tengdu sem „auka“. Mér finnst mjög gaman að geta nýtt þann miðil til að vera góð fyrirmynd og deilt því sem ég er að gera og nota en horfi ekki á það sem sérstakan auglýsingaplatform og er því sjaldan að taka að mér auka verkefni eða ný samstörf heldur er bara með mína föstu samstarfsaðila sem eru partur af daglega lífinu mínu.“

Birgitta Líf segir að þetta sé sjaldnast mikil vinna eða kvöð um að koma hlutum á framfæri.

„Ég stjórna algjörlega sjálf hvað ég set inn, hvernig og hversu oft og næ þannig að láta þetta ekki taka of mikið yfir. Það kemur þó auðvitað fyrir að það séu sérstök verkefni eða aukavinna en ég hef bara gaman að því.“


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
KVIKA
2,55
15
114.080
REGINN
1,72
20
295.203
SKEL
1,04
4
69.880
ICESEA
0,99
14
367.628
SJOVA
0,85
8
137.986

Mesta lækkun dagsins


Félag
Br.%
Fjöldi
Velta*
LEQ
-1,69
1
17.400
ICEAIR
-0,91
10
41.324
ORIGO
-0,8
5
16.128
VIS
-0,69
3
23.720
EIK
-0,69
11
341.177
Velkomin á Vísi. Þessi vefur notar vafrakökur. Sjá nánar.