Innlent

Segir Íslendinga eiga að hætta við leikinn gegn Tyrkjum

Vésteinn Örn Pétursson skrifar
Cenk Tosun, framherji Tyrklands, fagnar hér sigurmarki sínu gegn Albaníu með liðsfélögum sínum, að hermannasið.
Cenk Tosun, framherji Tyrklands, fagnar hér sigurmarki sínu gegn Albaníu með liðsfélögum sínum, að hermannasið. Vísir/Getty

Illugi Jökulsson, rithöfundur og samfélagsrýnir, birti stuttan pistil á Facebook-síðu sinni í dag þar sem hann segir að íslenska karlalandsliðið í fótbolta eigi að hætta skilyrðislaust við leik sinn við Tyrkland sem fer fram ytra 14. nóvember næstkomandi, þrátt fyrir að það gæti kostað liðið sæti á EM 2020. Formaður KSÍ segir ekkert slíkt vera í myndinni.

Ástæðuna segir Illugi vera innrás Tyrkja inn í Sýrland. Innrásin hefur vakið hörð viðbrögð margra í alþjóðasamfélaginu og hafa ýmsir fordæmt aðgerðir Tyrkja og atferli, meðal annars forseti leiðtogaráðs Evrópusambandsins og Arababandalagið.

Illugi segir Íslendinga þurfa að sýna af sér siðferðilega festu í málinu.

„Menn segja að ekki eigi að blanda saman íþróttum og stjórnmálum. Það er stundum rétt, en í fyrsta lagi, þá er árásarstríð ekki „stjórnmál.““

Bendir Illugi einnig á að tyrkneskir leikmenn virðist sjálfir styðja innrásina inn í Sýrland þar sem þeir fögnuðu að hermannasið eftir sigurmark liðsins gegn Albaníu á föstudag.

„Tyrknesku fótboltamennirnir [hafa] sjálfir tekið af skarið með þessu ljóta uppátæki í leik í fyrradag þegar þeir sýndu samstöðu með árásarsveitum landa sinna rétt í þann mund að þær voru að drepa fólk í Sýrlandi.“




UEFA skoðar athæfi Tyrkja

Evrópska knattspyrnusambandið, UEFA, hefur staðfest að umdeild fagnaðarlæti Tyrkja séu nú til rannsóknar. Eins og áður segir fögnuðu Tyrkirnir sigurmarki sínu gegn Albaníu, sem kom á lokamínútum leiksins, með því að heilsa að hermannasið. Þeir gerðu síðan slíkt hið sama í búningsherbergjum eftir leik, og hafa margir tekið athæfinu sem stuðningsyfirlýsingu við aðgerðir Tyrkja í Sýrlandi.




„Ég hef ekki séð atvikið, sem hægt væri að túlka sem ögrun,“ hefur þýski miðillinn DW eftir Philip Townsend, fjölmiðlafulltrúa UEFA,

„Banna reglurnar vísanir í trú- og stjórnmál? Já, og ég get lofað því að við munum taka málið til skoðunar.“

Philip Townsend, fjölmiðlafulltrúi evrópska knattspyrnusambandsins UEFA. Vísir/Getty

Guðni segir ekki hlutverk KSÍ að hafa eftirlit með öðrum þjóðum

Eins og fótboltaunnendum á Fróni er eflaust ljóst á Ísland enn möguleika á að tryggja sig inn á EM 2020, sem haldið verður víðs vegar um Evrópu.

Afleiðingar þess að hætta við leikinn yrðu þær að Tyrkjum yrði dæmdur sigur í þessum næst síðasta leik undankeppninnar og möguleiki Íslendinga á að tryggja sig inn á mótið án þess að fara í umspil myndi þannig nánast gufa upp.

Guðni Bergsson, formaður KSÍ, segir í samtali við Vísi að málið ekki hafa verið tekið til umfjöllunar hjá Knattspyrnusambandinu.

„Við höfum ekki verið að taka þetta til umfjöllunar. Í sjálfu sér held ég að það sé ekki okkar hlutverk að gera slíkt. Þetta er eitthvað sem að UEFA tekur til umfjöllunar ef að til kæmi. Það er að sjálfsögðu ekki okkar að hafa eftirlit með því hvernig aðrar þjóðir fagna eða haga sér á sínum heimavelli,“ segir Guðni og vísar þar til fagnaðarláta tyrkneska liðsins í leiknum gegn Albaníu.

Ef allt fer sem horfir mætir íslenska karlalandsliðið því tyrkneska í Istanbúl 14. nóvember næstkomandi. Næsti leikur Íslands er hins vegar gegn Andorra á Laugardalsvelli annað kvöld.

Guðni Bergsson, formaður KSÍ, segir mál tyrkneska landsliðsins ekki hafa komið á borð sambandsins. Vísir/Daníel Þór

Tengdar fréttir

Tyrkir ná landamæraborg á sitt vald

Tyrkneski herinn hefur náð sýrlensku landamæraborginni Ras al-Ayn á sitt vald, um er að ræða stærstu og mikilvægustu landvinninga Tyrkja síðan að innrás í Sýrland hófst 9. október síðastliðinn

Tusk fordæmir hótanir Erdogan

Tyrklandsforseti hótaði á fimmtudag að opna landamærin inn til Evrópu eftir að leiðtogar fordæmdu sókn Tyrkja inn í norðausturhluta Sýrlands.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.