Ríkislögreglustjóra skylt að innheimta 200 milljónir umfram rekstrarkostnað

Ríkislögreglustjóra er skylt að innheimta árlega um 200 milljónir króna umfram rekstrarkostnað lögreglubifreiða í ríkissjóð. Framkvæmdastjóri rekstrar embættisins segir að villa hafi verið í tölum yfir rekstrartekjur bílamiðstöðvar embættisins sem kynntar hafi verið lögreglustjórum. Þær hafi verið leiðréttar.

Í kvöldfréttum Stöðvar 2 í gær var sagt frá því að lögreglan á Norðurlandi vestra telji sig hafa verið ofrukkaða um hátt í 200% af bílamiðstöð ríkislögreglustjóra vegna leigu á lögreglubifreiðum. Á tæplega þriggja ára tímabili hafi embættið verið rukkað um rúmar 80 milljónir króna þótt rekstrarkostnaður næmi aðeins tæpum 30 milljónum.

Sjá einnig: Greiddu 82 milljónir fyrir fjóra lögreglubíla á þremur árum

Embættið sendi í morgun frá sér athugasemd vegna fréttar Stöðvar 2 í gær en þar segir að lög um opinber fjármál og framsetning fjárlaga leggi þá skyldu á herðar ríkislögreglustjóra að innheimta 200 milljónir umfram rekstrarkostnað í ríkissjóð. Á síðastliðnum þremur árum nemi fjárhæðin um 600 milljónum.

„Í fjárlögum er gert ráð fyrir því að ríkislögreglustjóri skili 200 milljón króna afgangi af rekstri lögreglubifreiða,“ segir Jónas Ingi Pétursson, framkvæmdastjóri rekstrar hjá Embætti ríkislögreglustjóra. „Fjármagnið náttúrlega fer til ríkissjóðs og síðan kemur þetta til baka til ríkisstofnanna úr ríkissjóði. Í þessu tilfelli koma fjárfestingaheimild upp á 200 milljónir til að standa undir endurnýjun á ökutækjum lögreglu,“ útskýrir Jónas.

Er ekki hægt að líta svo á að þetta sé bara skattheimta á lögregluembættin?

„Hugsanlega en þarna er það líka að þeir njóta þá fjárfestingarheimildarinnar, það er verið að kaupa þá tæki fyrir lögregluna,“ svarar Jónas. Í tilkynningu frá ríkislögreglustjóra á vef lögreglunnar þann 5. september síðastliðinn er gerð athugasemd við fréttaflutning Rúv af málefnum bílamiðstöðvar. Í tilkynningunni segir að frétt Rúv sé „byggð á sérkennilegum misskilningi.“

Þá hafnar embættið „því alfarið að bílamiðstöð hafi oftekið gjald sem nemur hundruðum milljónum króna af lögregluembættunum. Þær tölur séu „algerlega úr lausu lofti gripnar og eiga sér enga stoð,“ að því er segir í tilkynningunni frá 5. september. Í svari ríkislögreglustjóra við fyrirspurn fréttastofu Stöðvar 2 í gær segir hins vegar orðrétt að „lögregluembættin eru rukkuð um gjald sem er umfram raun rekstrarkostnað bifreiða.“ Afgangi eigi að skila í ríkissjóð.

Samkvæmt sömu gögnum og fréttastofa vitnaði til í gær nam samanlagður umframkostnaður allra lögregluembætta á tímabilinu tæpum 700 milljónum króna.

Er einhver ástæða til að efast um þær tölur?

„Ég þekki það ekki hvaða gögn þið hafið undir höndum en hins vegar er hugsanlegt að þessi gögn eigi uppruna sinn frá ríkislögreglustjóra, það er að segja, við unnum hér gögn upp fyrir fulltrúa lögreglustjóranna og í ljós kom að þessi gögn voru röng og þau fengu að vita það strax á fundi að það var villa í gögnunum og því var ekkert á þeim að byggja,“ segir Jónas.



Líkt og fram hefur komið liggur fyrir að bílamiðstöðinni verður lokað um áramótin samkvæmt tillögu ríkislögreglustjóra og lögreglustjóra við dómsmálaráðuneytið. Ráðherra féllst á þá tillögu í sumar og er nú til skoðunar hvað tekur við.