Fjarðaál fær nýjan forstjóra

Tor Arne Berg mun taka við stöðu forstjóra Alcoa Fjarðaáls um mánaðamótin september-október. Magnús Þór Ásmundsson, sem áður gegndi stöðunni, sagði starfi sínu lausu í júlí.

Í tilkynningu þar sem greint er frá ráðningu Tor Arne er ferill hans rakinn. Þar segir meðal annars að frá árinu 2017 hafi hann starfað sem forstjóri Lista í Noregi og þar á undan hafi hann stýrt starfsemi steypuskála í Evrópu og Ástralíu.

Í því starfi hafi hann m.a. verið yfirmaður framkvæmdastjóra steypuskála hjá Fjarðaáli.

Tor Arne hefur starfað hjá Alcoa frá árinu 2011 og unnið fjölbreytt störf fyrir fyrirtækið. Meðal annars hefur hann verið framkvæmdastjóri steypuskála hjá Lista, svo og framkvæmdastjóri innkaupa þar.

Hann mun yfirgefa stöðu sína sem forstjóri Lista þegar hann gengur til liðs við Fjarðaál.