Braust inn í HHS og stal talsverðu magni af lyfjum

Tveir karlmenn voru handteknir um síðastliðna helgi eftir að annar þeirra hafði brotist inn á Heilbrigðisstofnun Suðurnesja og stolið þar talsverðu magni af hinum ýmsu lyfjum.

Lögreglan á Suðurnesjum hafði hendur í hári mannsins svo og annars manns sem var með lyf úr innbrotinu í vörslum sínum. Þeir voru færðir til skýrslutöku á lögreglustöð, að því er segir í tilkynningu frá lögreglunni á Suðurnesjum.

Þá var karlmaður handtekinn eftir að hafa komist óséður inn í Svartsengi. Starfsmenn urðu hans varir, stöðvuðu för hans og kölluðu til lögreglu.

Í bakpoka sem maðurinn var með mátti finna ýmislegt, þar á meðal voru ýmsir munir sem taldir voru vera þýfi. Þá var hann með fartölvu sem hann hafði tekið ófrjálsri hendi í byggingunni. Í fórum sínum var hann einnig með hvítt efni sem hann kvað vera amfetamín.