Boða nauðungarsölu á eignum Björns Inga
Sýslumaðurinn á Vesturlandi, Ríkisskattstjóri, Hvalfjarðarsveit og Vátryggingafélag Íslands hafa farið fram á að fjórar eignir fjölmiðlamannsins Björns Inga Hrafnssonar í Hvalfjarðarsveit verði seldar nauðungarsölu.
Kröfur á eignirnar fjórar, Másstaði 2 til 5, nema alls um 40 milljónum króna að því er fram kemur í Lögbirtingablaðinu í dag. Þar segir jafnframt að sýslumaðurinn á Vesturlandi, sem hefur nauðungarsölur á sinni könnu, hafi boðað að beiðnir um nauðungarsölurnar verði teknar fyrir þann 22. ágúst næstkomandi, hafi þær ekki áður verið felldar niður.
Í útlistun Lögbirtingablaðsins, sem VB greindi fyrst frá, má lesa að kröfur á Másstaði 2 nema alls 10.813.290 krónum, á Másstöðum 3 hvílir 9.597.740 króna krafa, Másstaðir 4 bera 9.651.467 króna kröfur og á Másstöðum 5 liggja 9.725.735 krónur. Alls gera þetta kröfur upp á 39.788.232 krónur.
Björn Ingi rekur nú vefmiðilinn Viljann en hafði áður verið forsvarsmaður Pressusamstæðunnar sem rak meðal annars DV og Pressuna. Pressan var tekin til gjaldþrotaskipta í desember árið 2017. 315 milljón króna kröfum var lýst í þrotabú Pressunnar, en Björn Ingi hætti stjórnarformennsku í félaginu árið 2017. Þá var veitingastaðnum Argentínu steikhúsi, sem var í eigu Björns Inga, lokað í apríl í fyrra eftir árangurslaust fjárnám.
Tengdar fréttir
Hætta rannsókn á meintum skattaundanskotum Björns Inga
Ekki þykir tilefni til frekari aðgerða af hálfu embættisins.
Segir Björn Inga hafa boðist til að greiða milljóna skuld með steikum
Árni Harðarson, forvarsmaður Dalsins ehf. segir að Björn Ingi Hrafnsson hafi hótað Árna og öðrum eigendum Dalsins. Markmiðið hafi verið að koma sér framhjá skoðum opinberra aðila á bókhaldi og fjárreiðum Pressunar og tengdra miðla.
