Menning

Kristín Ey­steins blandar sér í bar­áttuna um Þjóð­leik­hús­stjóra­stólinn

Kolbeinn Tumi Daðason skrifar
Magnús Geir Þórðarson, Kristín Eysteinsdóttir og Ari Matthíasson munu berjast um starf Þjóðleikhússtjóra.
Magnús Geir Þórðarson, Kristín Eysteinsdóttir og Ari Matthíasson munu berjast um starf Þjóðleikhússtjóra. Vísir

Kristín Eysteinsdóttir Borgarleikhússtjóri hefur ákveðið að sækja um starf Þjóðleikhússtjóra. Þetta staðfestir hún í samtali við Vísi. Kristín hefur gegnt stöðu leikhússtjóra Borgarleikhússins frá árinu 2014 en hyggst nú söðla um og setjast í stól leikhússtjóra við Hverfisgötuna.

„Við höfum náð miklum listrænum og rekstrarlegum árangri á síðustu árum og nú langar mig að nýta reynslu og krafta mína til uppbyggingar og eflingar Þjóðleikhússins,“ segir Kristín í samtali við Vísi.

„Samningurinn minn sem Borgarleikhússtjóri rennur út í júlí 2021. Þegar það er ráðið í þessa stöðu er bara eitt og hálft ár eftir af mínum samningstíma. Ég met það því svo að nú sé rétti tíminn til að taka þetta skref.“

Aðspurð hvort hún meti það svo að staða Þjóðleikhússtjóra sé tignarlegri en staða Borgarleikhússtjóra segir hún leikhúsin ólík og skyldurnar sömuleiðis.

„Þetta er bara köllun mín að vera leikhússtjóri og mér hefur gengið afar vel sem slíkur. Mig langar að halda áfram að láta gott af mér leiða.“

Brynhildur Guðjónsdóttir vill ekki staðfesta umsókn sína. Fréttablaðið/Eyþór

Ari, Magnús Geir og líklega Brynhildur

Eins og Vísir greindi fyrstur miðla frá í morgun hefur Magnús Geir Þórðarson útvarpsstjóri ákveðið að sækja um starfið. Þá hefur Ari Matthíassonar, núverandi Þjóðleikhússtjóri, einnig lýst yfir áhuga á að stýra leikhúsinu í fimm ár til viðbótar. Hefur hann lagt inn umsókn þess efnis.

Brynhildur Guðjónsdóttir leikkona vildi ekki staðfesta umsókn sína í samtali við Vísi í morgun. Um væri að ræða þungaviktarfólk sem væri að sækja um og spennandi yrði að sjá hvaða nöfn kæmu upp úr hattinum þegar listi umsækjenda verður birtur.

Ljóst er að splunkunýs Þjóðleikhúsráðs bíður ærið verkefni að velja á milli kandídata í starfið. Halldór Guðmundsson er formaður nýs Þjóðleikhúsráðs sem tók einmitt til starfa í dag.

Að neðan má sjá bréf Kristínar til samstarfsfólks í Borgarleikhúsinu:

Kæra samstarfsfólk,

Ég vona að þið séuð að njóta verðskuldaðs og langþráðs sumarfrís.

Ég skrifa ykkur í dag til að upplýsa ykkur um að ég hef tekið þá ákvörðun að sækja um stöðu Þjóðleikhússtjóra sem er nú laus til umsóknar.

Ég hef á undanförnum vikum fengið mikla hvatningu til að sækja um starfið og þar sem samningur minn sem Borgarleikhússtjóri rennur út í júlí 2021 þá met ég það sem svo að nú sé rétti tíminn til að taka þetta skref.

Það verða án efa margir hæfir umsækjendur sem sækja um og ákvörðun varðandi ráðningu verður væntanlega ekki tekin fyrr en á haustmánuðum. Það breytist því ekkert, ég verð að sjálfsögðu ennþá hér og við höldum okkar striki inn í nýtt og spennandi leikár.

Næsta leikár liggur fyrir, kortasalan fer vel af stað og næsti vetur verður alger negla!

Ég tek þessa ákvörðun að vel hugsuðu máli,mér þykir óendanlega vænt um Borgarleikhúsið, ykkur öll og þann árangur sem við höfum náð saman á síðastliðnum árum. Ég vona að þið sýnið þessari ákvörðun minni skilning, lífið og listin þurfa að haldast á hreyfingu til að vaxa og dafna.


Bestu kveðjur og hlakka til að sjá ykkur í haust.

Kristín


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.