Innlent

Óska eftir rannsókn á meintum ólöglegum veiðum Hvals hf.

Sveinn Arnarsson skrifar
Í hvalstöðinni í Hvalfirði.
Í hvalstöðinni í Hvalfirði. Fréttablaðið/Vilhelm
Jarðarvinir hafa óskað eftir því að lögreglustjórinn á Vesturlandi taki til tafarlausrar rannsóknar og eftir atvikum sæki forsvarsmenn Hvals hf. til saka þar sem þeir telja veiðileyfi þeirra hafa runnið út árið 2018.

Fréttablaðið greindi frá því þann 20. apríl síðastliðinn að Jarðarvinir teldu hvalveiðar Hvals hf. árið 2018 hafa verið ólöglegar. Veiðileyfið hafi í raun runnið út vegna þess að þeir héldu ekkert til veiða árin 2016 og 2017.

Lagarök Jarðarvina eru þau að samkvæmt fyrstu grein laga um hvalveiðar sé það skilyrði að fyrirtæki uppfylli lög um fiskveiðar.

Í lögum um stjórn fiskveiða er síðan gerð grein fyrir því að veiðileyfi í atvinnuskyni falli niður hafi fiskiskipi ekki verið haldið til veiða í 12 mánuði.

Í lögum um hvalveiðar segir að brot varði allt að sex mánaða fangelsi, upptöku á veiðitækjum skips, byssum, skotlínum, skotfærum svo og öllum afla skipsins.

Einnig er talað um að kyrrsetja skuli skip sem staðið er að meintum ólöglegum veiðum þegar það kemur til hafnar og er ekki heimilt að láta það laust fyrr en dómur hefur verið kveðinn upp í máli ákæruvalds gegn skipstjóra skipsins eða máli hans lokið á annan hátt.

„Ákvæði þessi eru skýr og refsiheimildir ótvíræðar,“ segir í bréfi Jarðarvina til lögreglustjórans á Vesturlandi sem dagsett er þann 29. apríl síðastliðinn.

Auk þessarar kæru hefur lögreglustjórinn á Vesturlandi tvær aðrar kærur til rannsóknar.

Hvalur hf. skar aldrei hval innandyra eins og átti að gera en talað var um í reglugerð frá árinu 2010 að skera ætti hval á yfirbyggðum skurðfleti.

Einnig hefur lögreglustjórinn til rannsóknar meint brot skipstjóra Hvals hf. hvað varðar vanrækslu á skilum dagbóka skipstjóra til Fiskistofu árin 2014-2018.






Fleiri fréttir

Sjá meira


×