Körfubolti

Úrslitin ráðast hjá Martin

Hjörvar Ólafsson. skrifar
Martin í fyrsta leik liðanna.
Martin í fyrsta leik liðanna. vísir/getty
Martin Hermannsson og liðsfélagar hans hjá þýska liðinu Alba Berlin mæta spænska liðinu Valencia í kvöld í þriðja leik liðanna í úrslitum Evrópubikarsins í körfubolta karla á Spáni.

Staðan í einvígi liðanna er jöfn 1-1 en hafa þarf betur í þremur leikjum til þess að verða meistari og því er um hreinan úrslitaleik að ræða í Valencia í kvöld.

Martin hefur látið mikið að sér kveða í fyrstu tveimur leikjunum en hann var næst stigahæstur með 16 stig í tapi Alba Berlin í fyrsta leiknum og skoraði svo 14 stig þegar lið hans jafnaði metin með sigri eftir framlengdan leik í Berlín á föstudagskvöldið síðastliðið.

Alba Berlin hefur náð góðum árangri á fyrstu leiktíð Martins með liðinu en liðið tapaði í bikarúrslitum, er í toppbaráttu deildarkeppninnar og getur tryggt sér sigur í Evrópubikarnum.

Liðið sem fer með sigur af hólmi í þessum leik og hampar titlinum tryggir sér sæti í Evrópudeildinni á næsta keppnistímabili.






Fleiri fréttir

Sjá meira


×