Körfubolti

Brynjar: Er ekki gíraður í leiki gegn ÍR, Breiðabliki og Skallagrím

Ástrós Ýr Eggertsdóttir skrifar
Brynjar Þór Björnsson slapp við að mæta sínum gömlu félögum í KR í 8-liða úrslitunum
Brynjar Þór Björnsson slapp við að mæta sínum gömlu félögum í KR í 8-liða úrslitunum vísir/daníel þór

Brynjar Þór Björnsson sagði andann sem var í Tindastólsliðinu vera að koma aftur eftir stórsigur Tindastóls á Keflavík í lokaumferð Domino‘s deildar karla í körfubolta í kvöld.

Tindastóll vann 89-68 en hefði auðveldlega getað unnið mun stærri sigur, en Keflvíkingar náðu aðeins að laga stöðuna í lokin.

„Við erum ekki búnir að eiga alvöru stórleik síðan við vorum rassskelltir á móti Stjörnunni 7. febrúar. Þá vorum við á slæmum stað, mjög slæmum stað,“ sagði Brynjar eftir leikinn í kvöld.

„Við komum til baka, fáum inn PJ aftur og flæðið í leiknum var allt annað strax frá fyrstu æfingu þegar hann kemur til baka.“

„Með fullri virðingu fyrir ÍR, Breiðabliki og Skallagrím þá er ég ekki mjög gíraður fyrir þessa leiki, en þegar þú spilar á móti liðum í topp 5, topp 6, þá eru það alltaf stórleikir og við þurftum að vinna.“

Tindastóll átti á hættu að fara í fimmta sætið með tapi og þurfa að byrja úrslitakeppnina á útivelli gegn KR. Í staðinn mæta þeir Þór og byrja fyrsta leik á Sauðárkróki.

„Þessi andi kom aftur, sem var fyrir áramót, maður fann hann mæta loksins og þá erum við erfiðir við að eiga.“

„Við veittum vonandi stuðningsmönnunum von í brjósti um að við erum betri en það sem við höfum verið að sýna.“

„Við erum að framkvæma allt betur og betur, nú er allt að opnast og þá erum við gríðarlega sterkir,“ sagði Brynjar Þór Björnsson. 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.