Fannst á lífi 87 dögum eftir morðið á foreldrunum

Jayme Closs, þrettán ára stúlka frá Wisconsinríki í Bandaríkjunum, fannst á lífi í gærkvöldi eftir að hafa verið saknað síðan í október. Hún hvarf sama dag og foreldrar hennar fundust myrtir á heimili sínu.

Lögregla í Wisconsin greinir frá því að einstaklingur grunaður um aðild að málinu hafi verið handtekinn. Í frétt BBC er haft eftir fjölmiðlum vestanhafs að Closs hafi fundist í grennd við bæinn Gordon í Wisconsin en svo virðist sem henni hafi verið haldið í húsi á svipuðum slóðum. Ekki hefur fengist staðfest hvort Closs hafi verið rænt eða hvort hún hafi verið viðriðin morðið á foreldrum sínum.

Haft er eftir kennara við skóla á svæðinu að nágranni hafi gengið fram á Closs á fimmtudag. Þá hafi stúlkan verið afar grönn, skítug og klædd of stórum skóm.

Foreldrar Closs, 56 og 46 ára, fundust skotnir til bana í október síðastliðnum. Þegar lögregla kom á vettvang var Closs horfin og hvorki bólaði á morðingjanum né skotvopninu. Boðað hefur verið til blaðamannafundar vegna málsins í Wisconsin í dag.

#FBIMilwaukee needs your help, as the search continues to bring home 13 year old Jayme Closs, now missing & endangered after her parents were found dead in their home in Barron, WI early this week. Call the tip line 1-855-744-3879.#FindJayme pic.twitter.com/rNELlQKJb6

— FBI Milwaukee (@FBIMilwaukee) October 17, 2018