Nýársspá Siggu Kling – Hrúturinn: Þú tekur svo þýðingarmikla ákvörðun

Elsku Hrúturinn minn, þú ert á svo andlegu og töfrandi ári því að þú nærð að finna nákvæmlega út hvað þú vilt gera, en þú ert búinn að vera flæktur í svo margt og allskonar sem hefur rifið orkuna þína niður og sjálfið því þú hefur verið eins og á víð og dreif.

Það er eins og þú safnir þér saman og gerir þessar mörgu einingar í þér að einu sjálfi og af svo miklum krafti að það fær þig ekkert stöðvað og það verður enginn tossalisti þetta árið, heldur stendur framkvæmdalisti á þínu ári. Þú skynjar svo skýrt hverjir soga úr þér kraftinn og misnota afl þitt, svo þú sleppir þeim týpum lausum líkt og þú skýtur baunum úr teygjubyssu.

Þú munt öðlast meiri orku við það að hafa mikið að gera og við sem þér finnst virkilega skemmtilegt og heillandi og þú veist í hjarta þínu að þegar þér líður þannig þá ertu á réttri leið. Allt er að gerast í nákvæmlega réttri röð og talan sjö einkennir vorið, sem er andleg tala sem fyllir þig orku og hjálpar þér að velja rétt.

Þetta er líka tala þolinmæði, svo slepptu stjórnunartökum á öðru fólki og leyfðu þeim að bjarga sér sjálfum og þú verður alveg steinhissa á því hvað allir eru í raun og veru sjálfstæðari en þú heldur, svo mikið að þú fyllist stolti af þínu fólki. Ekki láta daprar hugsanir trufla þig of mikið, þá virkarðu leiður og skapvondur, tengdu þig frekar við tilfinningar þínar, sigurgleði og þakklæti, því þá muntu finna þann frið sem þér finnst stundum þig skorti.

Maí kemur sérstaklega fagnandi með góðar fréttir, sumarið er svo innilega þinn tími því þá leyfirðu þér að sleppa huganum frjálsum og slaka á. Þú tekur svo þýðingarmikla ákvörðun yfir sumartímann að það mun hafa áhrif á allt þitt líf þótt þú sjáir það ekki strax, en þetta er snilldarákvörðun, einföld og spennandi.

Það er svo mikilvægt þú skoðir á þessu ári að nota sköpunarhæfileika þína að einhverju tagi svo þú getir nýtt þínar fjölmörgu og mögnuðu hugmyndir og haustið gefur þér svo mörg tækifæri til að hrinda því sem þú vilt í framkvæmd að það raðast upp í kringum þig fólk og verkefni sem svo augljóslega kalla á þig, svo vertu í framboði.

Frægir Hrútar: Hera Björk Þórhallsdóttir söngkona, Silvía Lovetank listamaður, Björgvin Halldórsson söngvari, Kári Stefánsson vísindamaður, Vigdís Finnbogadóttir, fyrrverandi forseti, Hugh Hefner, Birgitta Jónsdóttir pírati, Anna Svava Knútsdóttir leikkona, Ólöf Erla, grafískur hönnunarsnillingur, Elton John söngvari, Salka Sól súperdrottning, Þóra í Atlanta, Sigmar Guðmundsson sjónvarpsmaður, Berglind Pétursdóttir, Steinunn Jónsdóttir, söngkona AmabAdamA, Þórhallur Þórhallsson uppistandari, Alda í Handy pandy, naglalistakona, Vala Grand, Hjálmar Forni listamaður, Jakob Bjarnar Grétarsson, Elín Björnsdóttir, fyrirlesari og kraftaverkakona, Guðbjörn Alexander Kling fótboltamaður, Theresa Rodriguez listamaður.