Febrúarspá Siggu Kling – Nautið: Sannleikurinn gerir þig frjálsan

Elsku Nautið mitt, þér finnst þú hafa verið eins og hálfgerður fangi, líkt og Gúliver í Puttalandi þegar hann var bundinn niður með örsmáum þráðum, en þú þarft bara að rífa þig lausan.

Stundum er það vaninn sem bindur mann niður, breyttu þá vananum og farðu aðra leið. Oftast er það fólk sem festir og stendur á bakinu á manni en það er samt þér að kenna, því ef þú stendur upp þá dettur náttúrulega þetta fólk af bakinu á þér, svo dustaðu bara rykið af fötunum þínum og stormaðu þína leið.

Þér finnst þú sért að finna tilganginn í lífi þínu og hlutverkið sem þú átt að leika, en það er mikilvægt þú skoðir það er bara aðalhlutverkið í boði, þetta er allt of stutt líf til þess að taka aukahlutverkið eða að vera í hópsenunni. Láttu til þín taka og skemmtu þér eins og enginn sé morgundagurinn, því hann er alls ekki til og þú þarft að skynja að láta ekki hús eiga þig, bíl eiga þig, eða veraldlega hluti tæma þig því þeir eru búnir til úr ryki.

Einlægni er það sem allt byggist á næstu mánuði, með því geturðu sigrar allar þær orrustur sem á vegi þínum verða, en ef þú lýgur einhverju þá bætast aðrar sjö við og þá verðurðu aftur eins og bundinn niður og getur ekki hreyft þig. Það er svo margt sem byggist á ímyndaðri hamingju, fyrir mér eru það til dæmis flugeldar, hugarbreytandi efni og annað húmbúkk sem við þurfum ekki og skilur ekkert eftir í sálinni.

Þú skalt gefa öllum sem þú hittir næsta dag gleði og í hvert skipti hækkar tilfinningin þín, en Naut eiga það til að vera atvinnufórnarlömb, ég á svo erfitt með að segja þetta að ég fæ sting í hjartað! Þess vegna er svo mikilvægt þú standir upp núna og látir enga gervigleði byrgja þér sýn.  Sannleikurinn gerir þig frjálsan, svo kýldu á það að lifa þínu ýtrasta því vorið er að koma, ástin fara að syngja eins og lóan og ef þú hefur einhvern áhuga skaltu syngja á móti. Knús og kossar, Kling.

Fræg Naut: Aron Einar Gunnarsson fyrirliði íslenska knattspyrnulandsliðsins, Hannes Þór Halldórsson markvörður, Ari Freyr Skúlason landsliðsmaður, Svali Kaldalóns fjölmiðlamógúll, Guðrún Veiga Guðmundsdóttir, rithöfundur og latikokkur, Ellý Ármanns fjölmiðlakona, Friðrik Þór Friðriksson leikstjóri, Valtýr Björn Valtýsson íþróttafréttamaður, Ólafur Ragnar Grímsson, Álfheiður Ingadóttir þingkona, Halldór Laxness, rithöfundur og skáld, Rúnar Freyr Gíslason leikari, Garðar Thor Cortes söngvari, Helga Möller söngkona, Katrín Tanja Davíðsdóttir crossfit-meistari, Nanna Bryndís Hilmarsdóttir söngkona, Pétur Jóhann Sigfússon, Addi Exos dj-snillingur, Davíð Rúnar Bjarnason, boxari, Þórunn Pálsdóttir fasteignasali, Silla Páls, ljósmyndari og listamaður.