Mourinho: Gott að við eigum leik á þriðjudaginn

Jose Mourinho, stjóri Manchester United, segir að það sé gott að liðið eigi leik strax á þriðjudaginn eftir afhroðið gegn West Ham í ensku úrvalsdeildinni í gær.

United tapaði 3-1 gegn West Ham í gær og stemningin er ekki góð á Old Trafford eftir dapra byrjun. Mourinho er þó ánægður með að það sé stutt í næsta leik og þar geti liðið bætt fyrir tapið.

„Ef ég tala fyrir sjálfan mig þá er ég mjög ánægður með að við eigum leik á þriðjudaginn,” sagði Portúgalinn er hann talaði um tapið.

„Ég er mjög ánægður að ég þurfi strax að fara hugsa um æfinguna á morgun og leikinn á þriðjudaginn. Ég vil frekar spila þá en að bíða í viku með slæmar tilfinningar.”

„Mig hlakkar til að spila á þriðjudaginn og ég vona að megnið af hópnum geri það líka. Ég get ekki kvartað yfir viðhorfi leikmannanna,” sagði Mourinho að lokum en sæti hans er talið ansi heitt.