Kuldaboli herðir tökin um helgina

Það verður frost um allt land um helgina ef marka má spákort Veðurstofu Íslands en eftir helgi á að hlýna strax aftur.

Í hugleiðingu veðurfræðings á vef Veðurstofunnar segir að í dag verði áfram hvöss norðaustan átt með úrkomu á Vestfjörðum, ýmist slyddu eða rigningu nærri sjónum.

Þá verður einnig hvasst á annesjum norðan til og rigning eða slydda með norður- og austurströndinni. Lægðardrag sem er austur af landinu kemur nær landi seinnipartinn og bætir því tímabundið í vind og úrkomu á Austfjörðum og með suðurströndinni.

„Á morgun verður vindur orðin skaplegur um mest allt land og stöku él í flestum landshlutum en á móti frystir um mest allt land seinnipartinn og á sunnudag herðir kuldaboli enn á okkur tökin, einkum þó inn til landsins.

Eftir helgi stefnir í að hláni með suðaustanátt, fremur hvassri og henni fylgir bæði talsverð væta og hlýindi sem munu lita veðurlag næstu viku að stærstum hluta,“ segir í hugleiðingum veðurfræðings.

Veðurhorfur:

Norðaustan 10-20 m/s, hvassast NV-til, en mun hægari fyrir sunnan. Slydda eða snjókoma á köflum á N-verðu landinu, rigning SA-lands og A-ast í fyrstu, en bjart með köflum SV-lands. Hvessir um tíma SA-til seinnipartinn. Hiti 0 til 5 stig, en vægt frost til landsins.

NA-læg átt á morgun, víða 5-13 m/s. Dálítil él á víða og dreif og frost um mest allt land, síst við S-ströndina.

Á laugardag:

Austlæg átt, 8-15 m/s, hvassast syðst. Hiti 0 til 5 stig. Stöku él á N-verðu landinu, en slydda eða rigning með köflum syðra fram eftir degi, en lægir síðan og léttir til og kólnar í veðri.

Á sunnudag:

Hæg austlæg eða breytileg átt bjartviðri, en vaxandi suðaustanátt og þykknar upp SV-lands um kvöldið. Frost víða 3 til 12 stig, kaldast NA-til, en frostlaust við S-ströndina.

Á mánudag:

Vaxandi suðaustanátt, hvassviðri með rigningu seinnipartinn, en hægari og þurrt NA-til. Hlýnar í veðri, fyrst SV-lands.

Á þriðjudag:

Suðaustan hvassviðri og rigning, en þurrt N-til og hiti 4 til 10 stig.