Fjögurra ára drengur beindi leisigeisla að umferð

Sterkum grænum leisergeisla var beint að umferð í Reykjanesbæ um helgina.

Í tilkynningu frá lögreglunni á Suðurnesjum segir að geislanum hafi meðal annars verið beint að bíl lögreglumanns sem var á ferðinni og hafi enginn vafi leikið á hvaðan geislinn kom.

„Lögregla ræddi við húsráðendur í viðkomandi húsi og kom þá í ljós að fjögurra ára sonur þeirra hafði verið að leika sér með leiserbendilinn í glugganum um kvöldið.

Fólkinu var tjáð að styrkur bendilsins væri það mikil að geislinn gæti beinlínis verið hættulegur. Fólkið bað lögreglu að taka hann og farga honum.

Lögreglan á Suðurnesjum ítrekar varnaðarorð sín vegna þeirrar hættu sem skapast getur ef leisergeislum er beint að umferð á landi eða í lofti,“ segir í tilkynningunni.