Lögreglan á Suðurlandi mun síðar í dag yfirheyra manninn og konuna sem úrskurðuð voru í gæsluvarðhald í liðinni viku vegna brunans við Kirkjuveg 18 á Selfossi. Þetta segir Oddur Árnason, yfirlögregluþjónn, í samtali við Vísi.
Konan og maðurinn voru úrskurðuð í vikulangt gæsluvarðhald en konan kærði úrskurðinn til Landsréttar sem felldi hann úr gildi í gær. Hún er þó enn í haldi yfirvalda þar sem hún hefur nú afplánun fangelsisvistar sem hún átti eftir að sitja af sér vegna eldri dóms.
Tvennt lést í brunanum og er grunur um íkveikju. Gæsluvarðhald yfir manninum rennur út á morgun en Oddur segir ekki liggja fyrir hvort farið verði fram á áframhaldandi varðhald. Ákvörðun um það verði væntanlega tekin á morgun.
Bruninn á Selfossi: Hin grunuðu yfirheyrð í dag
Tengdar fréttir
Tvennt lést í eldsvoða og tvö í gæsluvarðhaldi
Karl og kona voru í gærkvöldi úrskurðuð í viku langt gæsluvarðhald vegna rannsóknar á tildrögum eldsvoðans á Selfossi á miðvikudag. 47 ára kona og 49 ára karl létust í brunanum sem lögreglu grunar að hafi verið af mannavöldum.
Beint í fangelsi eftir að gæsluvarðhald var fellt úr gildi
Landsréttur felldi í dag úr gildi gæsluvarðhald yfir konu sem grunuð er um aðild að brennu að Kirkjuvegi 18 á Selfossi. Þetta kemur fram í tilkynningu frá lögreglunni.
Rannsókn á bruna á Selfossi á viðkvæmu stigi
Lögreglan á Suðurlandi vinnur áfram að rannsókn bruna sem kom upp í húsi við Kirkjuveg 18 á Selfossi síðastliðinn miðvikudag.
