Munir hinnar látnu fundust á manninum við handtöku

Lögreglan á Norðurlandi eystra tók í gær skýrslu af manni sem situr í gæsluvarðhaldi vegna andláts konu á Akureyri á sunnudag. Fyrirhugaðar eru fleiri skýrslutökur yfir manninum, en ekki náðist að taka skýrslu af honum á sunnudag vegna þess að hann var undir áhrifum lyfja.

Við handtöku fundust munir í vörslu mannsins sem tilheyrðu hinni látnu. Í dag fór fram húsleit á dvalarstað mannsins með hans samþykki. Þar lagði lögregla hald á síma og tölvubúnað sem tekinn verður til rannsóknar. Í tilkynningu frá lögreglu segir að maðurinn og hin látna hafi þekkst og höfðu verið í samskiptum kvöldið áður.

Krufning hefur farið fram og er niðurstöðu hennar nú beðið.

Í gæsluvarðhaldsúrskurði yfir manninum kemur fram að hann er grunaður um að hafa ekki komið konunni til hjálpar.

Konan fannst látin á heimili sínu á sunnudaginn og var það faðir konunnar sem kom að henni látinni en ung börn hennar voru á heimilinu. Í úrskurðinum segir að rannsókn málsins sé mjög skammt á veg komin en sérfræðingar frá tæknideild lögreglunnar á höfuðborgarsvæðinu voru sendir til Akureyrar í gær og aðstoðuðu þeir við vettvangsrannsókn sem lauk í gær.

Eftir eigi að rannsaka símasamskipti konunnar sem hugsanlega geti varpað ljósi á það hvenær hún hafi látist og einnig hvort fleiri hafi verið í íbúðinni.