Foreldrar stúlku á sjötta aldursári berjast enn fyrir því að dóttir þeirra fái að heita Alex Emma. Mannanafnanefnd hafnaði því að dóttir þeirra fengi að bera nafnið sem foreldrarnir völdu áður en sú stutta kom í heiminn. Nú er málið komið til meðferðar hjá Héraðsdómi Reykjavíkur þar sem foreldrarnir stefna íslenska ríkinu.

Mannanafnanefnd komst að þeirri niðurstöðu í desember 2014 að Alex geti aðeins talist karlmannsnafn í íslensku máli, þar sem engin saga eða hefð sé fyrir öðru. Í upphafi var þeim hótað 1500 króna dagsektum en ekkert varð af þeim.

Fjallað var um málið fyrir þremur árum, meðal annars í kvöldfréttum Stöðvar 2.

„Það kemur upp smá þrjóska, það á enginn að segja mér hvað barnið mitt á að heita,“ sagði Nanna Þórdís Árnadóttir, móðir Alex Emmu, fyrir þremur og hálfu ári. 

Krossleggja fingur

Fátt hefur breyst og málið komið fyrir dómstóla. Málið var þingfest á fimmtudag og aðalmeðferð fer fram þann 19. febrúar.

„Þetta er bara komið þangað, við krossleggjum fingur,“ segir Nanna Þórdís.

Stúlkan heitir Alex Emma hvert sem farið er nema þegar stúlkan fer á heilsugæsluna eða aðrar stofnanir sem notast við kerfi frá þjóðskrá.

„Hún var alltaf skráð sem stúlka en núna er hún bara punktur,“ segir Nanna Þórdís. Starfsfólk stofnana er yfirleitt nokkuð hissa þegar kennitalan er slegin inn.

„Það er ekkert um þessa kennitölu,“ er venjulega svarið en ekkert nafn fylgir. „Ekki einu sinni Ómarsdóttir,“ segir Nanna Þórdís. Þá er málið farið að vandast þar sem vegabréf Alex Emmu, þar sem hún hefur verið skráð stúlka Ómarsdóttir, er runnið út.

„Ef hún fær nýtt vegabréf, sem er náttúrulega ósvöruð spurning og enginn virðist geta svarað, þá verður bara punktur í vegabréfinu,“ segir Nanna Þórdís. Hún sjái ekki fyrir sér að leggjast í ferðalög með barn sitt á vegabréfi sem einhverjum gæti þótt tortryggilegt.

Gæti dregist þar til Alex Emma er byrjuð í skóla

Fjölskyldan á góða vinkonu sem heitir Alexandra en gengur alltaf undir nafinu Alex. Sú skrifar alltaf Alex, notar bara Alex að sögn Nönnu Þórdísar. Þá er nafnið algengt kvenmannsnafn sem karlmannsnafn í enskumælandi löndum.

„Okkur finnst þetta bara fáránlegt. En þau hafa bara bitið þetta í sig,“ segir Nanna Þórdís um baráttu sína við kerfið.

Arnar Þór Stefánsson hæstaréttarlögmaður gætir hagsmuna foreldranna en hann bauðst til þess að flytja málið fyrir þau. Kunna þau honum bestu þakkir fyrir. Nanna segir að í upphafi hafi stefnt í ansi mikinn kostnað. Þau hafi þó fengið 200 þúsund í gjafsókn frá ríkinu og tryggingarnar sjái um hluta.

„Þetta er ekki jafnslæmt og það leit út í upphafi en maður hefði helst ekki viljað borga neitt,“ segir Nanna Þórdís. Svo gæti farið að málskostnaður falli á íslenska ríkið vinni þau málið, sem er ómögulegt að spá fyrir um á þessu stigi.

Málið verður flutt í febrúar og dómur væntanlega upp kveðinn í mars. Sá aðili sem tapar hefur kost á að áfrýja þannig að lyktir málsins gætu dregist til 2019 eða þegar Alex Emma verður byrjuð í skóla.