Vildi að hann hefði ekki hikað

Carles Puigdemont, útlagi og fyrrverandi forseti héraðsstjórnar Katalóníu, sér eftir því að hafa ekki lýst yfir sjálfstæði héraðsins um leið og niðurstöður atkvæðagreiðslu þess efnis í byrjun október 2017 lágu fyrir. Þetta sagði Puigdemont í viðtali við belgíska miðilinn De Morgen í gær.

Sjálfstæði var ekki lýst yfir fyrr en á þingfundi þann 27. október, eftir að Puigdemont hafði gefið út afar óljósar yfirlýsingar á dögunum eftir kosningar. Sú yfirlýsing var einhliða og tóku yfirvöld í Madríd ekki mark á henni enda álítur hæstiréttur Spánar atkvæðagreiðslu Katalóna ólöglega. Puigdemont er, ásamt nokkrum fyrrverandi ráðherrum héraðsstjórnarinnar, á flótta vegna ákæru fyrir uppreisn gegn spænska ríkinu. Enn fleiri ráðherrar eru í haldi á Spáni.

Í viðtali við De Morgen sagðist Puigdemont hafa hikað til að gefa Spánverjum tækifæri á að mæta til viðræðna. Ríkisstjórnin hefði sent honum „skýr skilaboð“ þess efnis. „En þau reyndust gildra. Ég held að yfirvöld hafi einfaldlega viljað kaupa sér tíma til að virkja 155. grein stjórnarskrárinnar,“ sagði Puigdemont en með virkjun hennar tók ríkisstjórnin völdin í héraðinu.

Puigdemont kallaði í gær eftir því að Pedro Sánchez, sem tók við forsætisráðuneytinu í júní, ynni að því að draga úr spennunni á milli Katalóníu og Spánar. „Það er ekki hægt að segjast vilja ræða málin en segja á sama tíma að viðmælendur þínir séu hættulegir uppreisnarmenn.“

Þá kallaði hann eftir því að mál ráðherra héraðsstjórnarinnar fyrrverandi færu af borði spænskra dómstóla „þar sem öfgaöfl úr stjórnar­tíð Francos eru enn við völd“.

Útlaginn kallaði eftir því um helgina að Donald Tusk, forseti leiðtogaráðs ESB, tæki að sér hlutverk sáttasemjara í deilunni. Því hafnaði aðstoðarmaður Tusks í gær og sagði að Spánverjar ættu að leysa málið sjálfir.