Samgönguáætlun og sakamál aldarinnar í Víglínunni

Eitt umdeildasta þingmál hvers tíma hefur verið lagt fram á Alþingi eða samgönguáætlun. Hún nær yfir allar framkvæmdir í samgöngumálum sem núverandi stjórnvöld hyggjast ráðast í á næstu fimm til fimmtán árum, hvort sem er í flugvalla- og hafnarmálum eða vegamálum. Þingmenn allra flokka eru á tánum þegar samgönguáætlun er annars vegar, enda snertir hún kjördæmi þeirra og fólkið sem í þeim býr með afgerandi hætti og kjósendur eru ósparir á gagnrýni á þingmenn geri þeir ekki nóg að þeirra mati.

Sigurður ingi Jóhannsson samgönguráðherra kemur í Víglínuna til Heimis Más Péturssonar fréttamanns á Stöð 2 og Vísi í hádeginu til að fara yfir áætlunina sem annars vegar nær til ársins 2023 og hins vegar til 2030.

Afgerandi kaflaskil urðu í umdeildasta sakamáli Íslandssögunnar á fimmtudag þegar Hæstiréttur sýknaði fimm karlmenn sem rétturinn hafði áður dæmt til þungra refsinga árið 1980 fyrir að hafa orðið tveimur mönnum að bana sex árum áður. Forsætisráðherra hefur fyrir hönd stjórnvalda beðið fimmmenningana og ættingja þeirra afsökunar á framferði réttarkerfisins, en eftir stendur að fjölmiðlar þess tíma og almenningur léku stórt hlutverk í að mennirnir voru dæmdir ásamt Erlu Bolladóttur sem ekki fékk náð hjá saksóknara við endurupptöku málsins.

Erla mætir í Víglínuna til að ræða dóminn og þá stöðu sem hún nú er í en þessi mál hafa hvílt eins og mara á henni í fjörutíu og fjögur ár.

Víglínan er í opinni dagskrá og beinni útsendingu á Stöð 2 og Vísi klukkan 12:20.