Vinnustöðvun flugfreyja hjá Primera hefst að óbreyttu 15. nóvember

Ótímabundin allsherjarvinnustöðvun flugfreyja hjá Primera Air Nordic hefst þann 15. nóvember kjarasamningar nást ekki fyrir þann tíma. Lögfræðingur hjá Alþýðusambandi Íslands segir fyrirtækið stunda gróf brot gegn starfsfólki og hafi lengi neitað að gera kjarasamninga.

Stjórnar- og trúnaðarráð Flugfreyjufélagsins samþykkti í ágúst að hefja skyldi atkvæðagreiðslu um boðun ótímabundinnar vinnustöðvunar flugfreyja um borð í flugvélum Primera Air Nordic SIA sem fljúga farþegum frá Íslandi til annarra áfangastaða en félagið er skráð í Lettlandi.

Atkvæðagreiðslu lauk í gær og var vinnustöðvunin samþykkt með 567 atkvæði gegn einu. Magnús Norðdhal, lögfræðingur hjá ASÍ segir fyrirtækið líta svo á að það starfi ekki innan íslenskrar efnahagslögsögu.

„Þar af leiðandi þurfi þeir hvorki að virða kjarasamninga eða grundvallarréttindi launafólks. Þessu er Flugfreyjufélag Íslands, Alþýðusamband Íslands og raunar öll verkalýðshreyfingin á Norðurlöndunum gjörsamlega ósammála Þetta er atvinnustarfsemi sem fellur undir íslenska lögsögu og kjarasamninga og það þarf að gera kjarasamninga við fyrirtækið og því hafa þeir neitað,“ segir Magnús.

Sökum þessa hafi verið boðað til vinnustöðvunar en ef af verður neyðist flugfélagið til að fella niður áætlunarferðir til og frá Íslandi. Atkvæðisrétt höfðu allir félagsmenn í Flugfreyjufélagi Íslands.

„Verkfallið er boðað með heimild í lögum númer 80/1938 með atkvæðagreiðslu allra félagsmanna í Flugfreyjufélagi Íslands, nákvæmlega til þess að þurfa ekki að taka út fyrir sviga tiltekna félagsmenn því að það setur þá í hættu á að þeim verði refsað fyrir þátttöku sína,“ segir Magnús sem segir liggja fyrir skýrar sannanir fyrir því að fyrirtækið brjóti á réttindum starfsfólks sem að stórum hluta kemur frá ríkjum í Austur Evrópu.

„Það er ekki verið að virða lágmarkskjör þessara flugliða. Þeir eru á einhverjum kjörum sem að eru helmingur af því sem það á að vera samkvæmt íslenskum kjarasamningum, eru skilgreindir sem verktakar, sjálfstæðir verktakar ráðnir í gegnum starfsmannaleigur í einhverjum skattaskjólum þannig að það er ýmislegt gert til þess að koma í veg fyrir að greiða þessu fólki,“ segir Magnús.

Flugfreyjufélagið boðaði einnig vinnustöðvun á í maí á síðasta ári sem Primera kærði til félagsdóms.  Félagsdómur dæmdi boðaða vinnustöðvun ólögmæta með vísan til þess að engar samningaviðræður hafi farið fram fyrir milligöngu ríkissáttasemjara áður en boðað var til verkfallsins en vinnustöðvun er neyðarúrræði sem samkvæmt meginsjónarmiðum skal aðeins grípa til hafi aðrar sáttaumleitanir ekki borið árangur. Síðan þá hefur ríkissaksóknari boðað sjö fundi sem fulltrúar Primera hafa sniðgengið. Ekki er útilokað að Primera kæri aftur til félagsdóms.