Fluttur á Hólmsheiði fyrir spjall á golfvelli

Fangelsisyfirvöld eru harðlega gagnrýnd í yfirlýsingu frá Afstöðu, félagi fanga, vegna beitingar agaviðurlaga gagnvart Barry Van Tuijl sem fluttur var frá opna fangelsinu að Kvíabryggju, þar sem hann hefur afplánað dóm undanfarin ár, í fangelsið á Hólmsheiði fyrr í vikunni.

Málsatvikum er lýst þannig í yfirlýsingunni að Barry hafi fengið símtal frá fyrrverandi samfanga sem bað hann að hitta sig á golfvelli Kvíabryggju þar sem hann kvaðst vera staddur. Golfvöllurinn er á lóð fangelsisins, við framhlið aðalbyggingarinnar og engin leið að leynast á vellinum. Þangað hafi Barry farið án þess að gera sér grein fyrir að í því gæti falist brot á reglum fangelsisins.

Sjá einnig: Einfættur fangi fær ekki náðun

Var honum í kjölfarið birt ákvörðun um flutning á Hólmsheiði, með þeim rökum að hann hefði fengið ósamþykkta heimsókn andstætt reglum fangelsisins.

Barry, sem er frá Hollandi og fær ekki margar heimsóknir í fangelsið, gat ekki, að mati félagsins, átt von á því að menn væru í leyfisleysi á lóð fangelsisins og þaðan af síður að hann sjálfur gæti borið ábyrgð á veru umrædds manns þar.

Í yfirlýsingu Afstöðu er Barry sagður fyrirmyndarfangi og vel liðinn meðal samfanga sinna. Hann hafi lagt sig fram um að aðstoða samfanga sína við nám og verið til staðar í andlegum erfiðleikum þeirra. 

Barry sótti um náðun í fyrra og í umsókn hans segir að fangaverðir á Kvíabryggju geti vitnað um góða hegðun hans að ofangreindu leyti.

Barry missti fót í bílslysi fyrir nokkrum árum og getur ekki nýtt rétt sinn til að afplána síðasta hluta dómsins á áfangaheimilinu Vernd, enda húsið óíbúðarhæft fyrir jafn fatlaðan einstakling og Barry. Hann nýtur heldur ekki fullra sjúkra- og örorkuréttinda hér á landi og vegna þessara aðstæðna sótti Barry um náðun enda vildi hann helst komast heim til Hollands þar sem hann nyti fullra réttinda. Honum var hins vegar synjað um náðun eins og Fréttablaðið greindi frá í janúar.

Afstaða, félag fanga, gagnrýnir hörkuna í agaviðurlögum stofnunarinnar enda mikill réttindamissir að fara úr opnu fangelsi í lokað. Vísað er meðal annars til ákvæða í lögum um fullnustu refsinga sem kveða á um að við fyrsta agabroti megi eingöngu veita skriflega áminningu ef um smávægilegt brot er að ræða.

Erla Kristín Árnadóttir, staðgengill forstjóra Fangelsismálastofnunar, segist ekki getað tjáð sig um mál einstakra fanga en segir brot á heimsóknarreglum geta verið misalvarleg og varðað mismunandi agaviðurlög. Við slíka ákvörðun þurfi að hafa meðalhófsreglu í huga enda um stjórnsýsluákvörðun að ræða.