Tildrög flugatviksins enn óljós

Lögreglan rannsakar nú flugatvik sunnan Skálavatns í gærkvöldi. Tildrög eru enn óljós þar sem rannsóknin er enn á frumstigi, samkvæmt upplýsingum frá lögreglunni á Norðurlandi Eystra. Samkvæmt heimildum Vísis er flugmaðurinn nú í skýrslutöku hjá lögreglu. 

Ekki urðu nein slys á fólki og við fyrstu sýn virðist flugvélin lítið skemmd, karl og kona voru í vélinni.  Rannsóknarlögreglumenn ásamt rannsóknarnefnd Samgöngustofu sinntu vettvangsrannsókn fram á nótt og voru þeir fluttir tilbaka með þyrlu Landhelgisgæslunnar um hálf tvö. Aðgerðarstjórn Almannavarnanefndar Eyjafjarðar hætti svo störfum um klukkutíma síðar.

Eins og kom fram á Vísi í morgun sá þyrla Landhelgisgæslunnar um að flytja fólkið á sjúkrahús á Akureyri til skoðunar. Eftir það flutti hún lögreglu og rannsóknarnefndina aftur á vettvang. Hún skilaði þeim svo af sér og var lent í Reykjavík um klukkan þrjú í nótt. 

Ásgeir Erlendsson upplýsingafulltrúi Landhelgisgæslunnar sagði í samtali við Vísi í dag að aðgerðir hafi gengið mjög vel.