Bandarískir stjórnarerindrekar komnir til Norður-Kóreu til skrafs og ráðagerða

Hópur bandarískra stjórnarerindreka flaug til Norður-Kóreu í morgun til að aðstoða við skipulagningu leiðtogafundar sem enn er óljóst hvort verður af. Til stóð að Trump Bandaríkjaforseti myndi þinga með Kim Jong-un, leiðtoga Norður-Kóreu, í Singapúr þann tólfta næsta mánaðar.

Eftir að utanríkisráðherra Bandaríkjanna lét í veðri vaka að Kim yrði drepinn ef hann sætti sig ekki við afarkosti Bandaríkjanna sendu stjórnvöld í Pyongyang frá sér harðorða yfirlýsingu sem varð til þess að Trump aflýsti fundinum.



Nú virðist allt kapp vera lagt á að koma fundinum aftur á, þá líklega á sama stað og tíma. Moon Jae-in, forseta Suður-Kóreu, var að sögn mjög brugðið þegar fundinum var aflýst og hefur hann þrýst mjög á Kim og Trump að endurskoða afstöðu sína. Nýjustu fregnir herma að Moon verði með á fundinum ef af honum verður.