Forsætisráðherra drap biskup við skákborðið

Forsætisráðherra drap biskup við Reykjavíkurhöfn í dag. Þó var aðeins um skákmann að ræða, en skákmaraþon Hróksins til styrktar börnum í Jemen hófst í morgun. Þar er áheitum og styrkjum safnað við skákiðkun næstu tvo daga, en tilefnið er að ár er nú liðið frá andláti Jóhönnu Kristjónsdóttur, móður Hrafns Jökulssonar, forseta Hróksins. Jóhanna kynnti fjölmarga Íslendinga fyrir Mið-Austurlöndum sem fararstjóri um árabil auk þess að vera ötul í góðgerðarstarfi og ýmiss konar söfnunum.

„Þetta er bara eitt versta neyðarástand í heimi. Af 29 milljón íbúum þá þurfa 22 milljónir á neyðaraðstoð að halda. Þar af eru 11,3 milljónir barna, sem er næstum því hvert einasta barn í landinu,“ segir Bergsteinn Jónsson, framkvæmdastjóri UNICEF á Íslandi um ástandið í Jemen.

Teflt var frá klukkan níu í morgun og stendur maraþonið allt fram til miðnættis. Andstæðingurinn Róbert Lagerman, varaforseti Hróksins, var ósigraður þegar fréttastofu bar að garði.

„Úrslitin í raun og veru skipta engu máli. Það er bara að koma og tefla, taka þátt í þessari söfnun við okkur,“ segir Róbert.

Bæði er teflt í dag og á morgun – allt til miðnættis. Fjölmörg fyrirtæki styrkja söfnunina, bæði með beinum styrkjum auk þess sem þau styrkja UNICEF og Fatimusjóðinn svokallaða fyrir hverja teflda og skráða skák. Þegar hafa safnast á fimmtu milljón króna, en Hróksmenn hvetja alla til að mæta og tefla.  

„Það er bara um að gera að styrkja börn í Jemen,“ segir Henný Nielsen, herforingi hjá Hróknum.