Stefán Rafn með fimm mörk í sjötta sigrinum í röð

Stefán Rafn Sigurmannsson og félagar í Pick Szeged lentu í engum vandræðum með að sigra Komló í ungversku úrvalsdeildinni í handbolta í dag. Lokatölur 38-24.

Stefán Rafn og félagar voru sterkari allt frá upphafi til enda, en þeir leiddu í hálfleik, 21-13. Eftirleikurinn auðveldur og að endingu varð munurinn fjórtán mörk.

Þetta var sjötti sigur Pick í röð, en Stefán Rafn átti enn einn afbragðsleikinn. Hafnfirðingurinn knái skoraði fimm mörk, en liðið er tveimur stigum á eftir Veszprém. Veszprém á þó tvo leiki til góða.