Gular viðvaranir og lélegt skyggni

Íslendingar á vesturhelmingi og suðausturhorni landsins mega gera ráð fyrir hvassviðri og dimmri él í dag. Gular viðvaranir eru í gildi fyrir sjö spásvæði af ellefu og mun veðrið ekki ganga niður fyrr en á morgun í mörgum þeirra.

Gera má ráð fyrir því að skyggni og færð spillist ört, ekki síst á fjallvegum en einnig í íbúagötum á Suðurlandi og suðvesturhorninu.

Það verður þó nokkuð úrkomulítið á Austurlandi og frostið bærilegt, á bilinu 1 til 6 síðdegis.

Það lægir svo smám saman á morgun og þá styttir upp um landið vestanvert í eftirmiðdaginn. „Það er hins vegar skammgóður vermir, því aðfaranótt miðvikudags er útlit fyrir hvassa suðaustanátt með snjókomu, en slyddu eða rigningu um tíma á Suður- og Vesturlandi,“ segir veðurfræðingur.

Svo snýst aftur í suðvestanátt á miðvikudag með éljagangi sunnan- og vestanlands - en útlit er fyrir svipað veður áfram á fimmtudag. Þá er gert ráð fyrir umhleypingasömu veðri um helgina.

Veðurhorfur á landinu næstu daga

Á þriðjudag:

Minnkandi vestanátt og él fram yfir hádegi V-til, en léttskýjað á A-verðu landinu. Frost 2 til 15 stig, kaldast í innsveitum NA-lands. Snýst í vaxandi suðaustanátt á SV- og V-landi um kvöldið.

Á miðvikudag:

Suðaustan hvassviðri með snjókomu eða rigningu um morguninn, síðan talsvert hægari suðvestanátt með éljum, fyrst V-til. Kólnar í veðri og léttir til á NA- og A-landi seinni partinn.

Á fimmtudag og föstudag:

Suðvestanátt og él, en þurrt og bjart veður á NA- og A-landi. Frost 1 til 10 stig, kaldast fyrir norðan og austan.