Helena bæði stigahæst og framlagshæst í fyrsta leiknum með Englunum

Helena Sverrisdóttir lék í kvöld sinn fyrsta leik með Good Angels Kosice þegar liðið tapaði á útivelli á móti franska liðinu Basket Landes í Evrópukeppninni.

Basket Landes vann leikinn 69-55 eftir að hafa verið 26-8 yfir eftir fyrsta leikhlutann.  Þetta var fyrri leikur liðanna í sextán liða úrslitum en seinni leikurinn fer fram á heimavelli Good Angels Kosice. Helena og félagar þurfta því að vinna upp fjórtán stiga forystu Frakkanna.

Helena Sverrisdóttir skoraði 9 stig og var stigahæst hjá leikmönnum Englanna en hún var einnig með hæsta framlagið í liðinu (14). Helena skoraði jafnmikið og tveir aðrir leikmenn Good Angels Kosice.

Helena hitti úr 4 af 6 skotum sínum og var með 9 stig, 5 fráköst, 1 stoðsendingu og 1 stolinn bolta á 21 mínútu.

Helena Sverrisdóttir mun leika með Good Angels Kosice út janúarmánaðar en snýr þá aftur til Haukanna þar sem hún fór á kostum fyrir jól.