Nýársspá Siggu Kling - Sporðdrekinn: Ekki hugsa að eitthvað hafi eyðilagt líf þitt

Elsku Sporðdrekinn minn, þú ert með mjög mikinn kraft yfir þessu ári og munt hafa mun meiri stjórn á lífi þínu en þú hefur nokkurn tíma haft, en það eina sem mun hindra þig er að þú veljir að deyfa þig niður í andleysi eða nota efni eins og áfengi eða lyf til þess að stöðva hugsanir þínar. Það eru svo margir í þínu merki sem hafa náð ótrúlegum árangri með því að vera templarar eins og Magnús Scheving, Helga Braga og fleiri og fleiri.

Að vera templari er einfaldlega að velja að nota ekki hugbreytandi efni í lífi sínu. Þú ert á rosalega sterkri tölu í talnaspekinni þetta árið og þetta verður sá tími sem þú ákveður hvernig þú vilt að framtíð þín fari. Fyrriparturinn af árinu byggist reyndar ekki á því heldur byggist hann á stormasamri hringiðu í kringum þig sem þú getur ósjálfrátt orðið þáttakandi í ef þú skiptir þér of mikið af. En stundum þarf maður ekki að hafa skoðun á öllu og öllum, heldur sleppa tökunum og leyfa lífinu bara að gerast.

Þú ert svo „mórölsk“ manneskja svo það gæti eitthvað gamalt tekið sig upp og eyðilagt fyrir þér í dag, en þú hefur val svo þú skalt velja að vera í núinu og velja að gera þitt besta nákvæmlega hér og nú eða eins og ég kalla: „Að vera eða to be“. Af svona móral myndast nefnilega streita og af streitunni myndast veikindi, og ef þú finnur fyrir þessu spurðu þá sjálfan þig: „Af hverju er þetta svona?“ Og það er svo merkilegt að ef þú spyrð veröldina þá færir hún þér svarið. Þú ert nefnilega eitt öflugasta merkið í að skynja hlutina og taka við hugboðum og það er nákvæmlega það sem spámaður gerir; það er fyrsta hugboð sem skiptir máli svo farðu að leyfa þér að gera það sem þú vilt og hlustaðu á hugboðin og svörin.

Það er mikið drama í þér og þú heldur stundum að þú yrðir hamingjusamari ef þú hefðir meiri peninga, betri vinnu eða ættir barn eða eitthvað annað, en hamingjan liggur aldrei í þessu, hún byrjar áður og í sjálfum þér því ekkert veitir þér hamingju nema þú og þín eigin hugsun og tilvera. Ekki leyfa þér að hugsa að eitthvað hafi eyðilagt líf þitt og þess vegna getirðu ekki haldið áfram, því hugsun þín verður að orku og þar af leiðandi þinn veruleiki.

Ég hef áður sagt að það séu til tvenns konar Sporðdrekar; þeir sem eru langt yfir meðallagi í lífinu eða þeir sem telja að þeir hafi orðið undir í lífinu og ekkert hafi gerst hjá þeim. Orð og hugsanir hafa afl og ég skrifaði einu sinni „Orð hafa álög“ svo ef þú ert sá Sporðdreki sem ert leiður og finnst ekkert gott hafa gerst hjá þér, ekkert sem þú hélst að myndi veita þér hamingju, breyttu þá orðum þínum og hugsunum og það gerist smátt og smátt með breyttu hugarfari.

Hins vegar ertu á dásamlegu ári til að breyta svo mörgu í kringum þig, en þú verður bara að vita hvað þú vilt og trúa á það því að þá mun lífið færa þér það. Þeir sem eru á lausu eiga að hætta að spá í þá týpu sem þeir héldu að myndi henta þeim, eða eins og fólk segir oft: „Þetta er mín týpa“, því að svarið til þín og þíns ástarvesens er: Gefðu öðruvísi týpum séns. Fyrir þá sem eru óhamingjusamir í sambandi og hafa verið lengi verður þetta ár uppgjörs, svo spennandi tímar eru framundan, elskan mín.

Frægir Sporðdrekar: Birkir Már Sævarsson landsliðsmaður, Dísa í World Class, Helga Braga Jónsdóttir leikkona, Björk Guðmundsdóttir söngkona, Scarlett Johansson leikkona, Whoopie Goldberg leikkona, Sigríður Elva Vilhjálmsdóttir sjónvarpskona, Emmsjé Gauti rappari, Björk, Indira Ghandi, Karl bretaprins, Hillary Clinton, Leonardo DiCaprio, Magnús Scheving, Steingrímur Sævarr Ólafsson fjölmiðlaráðgjafi, Guðný Hrefna Sverrisdóttir, flugfreyja og gourmé kokkur, Hörður Ágústsson Macland snillingur.