Óttast að tala látinna af völdum fellibyls hækki

Björgunarlið er nú byrjað að fara í gegnum svæði sem fellibylurinn Mikael lagði í rúst á norðanverðum Flórídaskaga. Staðfest er að sautján manns að minnsta kosti hafi farist og reiknað er með að sú tala eigi eftir að fara hækkandi eftir því sem leitinni á svæðinu miðar áfram um helgina.

Mikael gekk á land á Flórída á miðvikudag og var einn öflugasti fellibylur í sögu Bandaríkjanna. Heilu og hálfu bæirnir eru nánast rústir einar eftir hamfarirnar.

Átta manns hafa fundist látnir á Flórída, fimm í Virginíu, þrír í Norður-Karlólínu og einn í Georgíu. Björgunarlið hefur enn ekki komist að Mexíkóströnd á Flórída sem virðist hafa orðið verst úti í fellibylnum, að sögn breska ríkisútvarpsins BBC.

Íbúum þar hafði verið skipað að yfirgefa svæðið áður en fellibylurinn skall á. Engu að síður er talið að hátt í þrjú hundruð af um þúsund íbúum bæjarins hafi ákveðið að vera um kyrrt.

Hundruð manna er enn saknað þar sem Mikael gekk yfir en fjarskiptasamband liggur enn niðri víða.