Bein útsending: Kvöldfréttir Stöðvar 2

Í kvöldfréttum Stöðvar 2 ræðum við Ástu Kristínu Andrésdóttur, hjúkrunarfræðing, en íslenska ríkið var sýknað af skaðabótakröfu hennar með dómi Landsrétts í síðustu viku.

Ásta var á sínum tíma ákærð fyrir manndráp af gáleysi í kjölfar þess að sjúklingur á Landspítalanum, sem var í hennar umsjá, lést í byrjun október 2012. Héraðsdómur sýknaði Ástu árið 2015 af ákærunni um manndráp af gáleysi og í kjölfarið fór hún í skaðabótamál þar sem hún fór fram á fjórar milljónir í skaðabætur.

Við heyrum einnig í Erlu Bolladóttur, sem var einn sakborninga í Guðmundar og Geirfinnsmálinu en hún var sú eina sem hlaut ekki náð endurupptökunefndar í febrúar síðastliðnum. Fimm aðrir úr málinu voru sýknaðir í síðustu viku og nú í kjölfarið mun Erla kæraniðurstöðu endurupptökunefndar.

Í fréttatímanum rifjum við upp að á þessum degi fyrir sléttum áratug voru kynnt í Seðlabankanum áform um kaup ríkisins á sjötíu og fimm prósenta hlut í Glitni banka samhliða hlutafjáraukningu í bankanum. Áformin runnu hins vegar út í sandinn því það dróst að boða til hluthafafundar í Glitni til að samþykkja kaupin. 

Þá sjáum við einnig aðstæður þar sem öflug sprenging var í húsi við Þinghólsbraut í Kópavogi í morgun.