Ekta hressileika rugludalla gleðikeppni

Keppnin Mývatnssleðinn fer fram í fjórða sinn í mars á hinu fallega en umdeilda Mývatni. Vatnið og nágrenni hefur verið mikið á vörum fólks vegna alls konar skítamála að undanförnu. Keppnin hefur verið haldin á tveggja ára fresti frá 2011 en hún byrjaði sem létt grín þeirra félaga Stefáns Péturs Sólveigarsonar og Albans Schultz. Stefán er uppalinn í Mývatnssveit en býr í Reykjavík þar sem hann er starfar sem vöruhönnuður og flugþjónn. Hann heldur tengslum sínum við sveitina meðal annars með því að halda keppnina. „Fyrir mörgum árum byrjuðum við Alban að fara í ferðir í Mývatnssveit sem gengu út á það að fara í gangnamannakofa með alls konar gúmmelaði. Til að komast með allt góssið í kofann var auðveldast að smíða góðan sleða, því ekki áttum við vélsleða. Bæði fórum við tveir og líka með fleiri vinum. Í þessum ferðum kom oft fyrir að einhver partur af sleðanum bilaði eða brotnaði og við enduðum jafnvel á að nánast krafla okkur á nöglunum inn í kofann en þegar það loksins tókst þá urðu bæði matur og drykkur að bestu veigum og steikum sem við höfðum smakkað. Þegar við höfðum gert þetta í nokkur ár vorum við orðnir nokkuð góðir í að smíða sleða sem hægt var að draga yfir úfið hraun, hjarn og púður. Þá var bara kominn tími til að breyta til. Úr varð Mývatnssleðinn sem er með allt öðru formi,“ segir Stefán. Hvert lið er skipað tveimur keppendum sem hanna og smíða sleða sem hvorki má vera knúinn vélarafli né dreginn eða ýtt af dýri. Hönnunin er algjörlega frjáls að öðru leyti. Keppt er í stuttri hraðabraut þar sem liðin fara tvo hringi ein og sér. Í lengri braut þar sem liðin öll fara á sama tíma má trufla aðra keppendur upp að vissu marki en dómari getur dæmt stig af fyrir að fara yfir strikið í truflun. Keppnin fer fram á sama stað og stórmyndin Fast and the Furious 8 var tekin upp. Þá voru skriðdrekar og hraðskreiðir bílar á vatninu en sleðakeppendur munu væntanlega fara ögn hægar yfir. „Þetta er ekta hressileika rugludalla gleðikeppni. Fyrir okkur er jafn gaman dagana fyrir keppnina þegar hönnun og smíði fer fram,“ segir Stefán. benediktboas@365.is