Herjað á einkennisdýr Ástralíu

Ástralska lögreglan rannsakar nú það sem sagður er vera dýraníðsfaraldur í landinu. Undanfarna mánuði hafa fundist hræ dýra, sem flest eru einkennandi fyrir hið fjölbreytta lífríki landsins, víðsvegar um Ástralíu, nú síðast á mánudag.

Þar hafði kóalabjörn verið drepinn og eyrun skorin af honum. Hræ hans fannst um 250 kílómetra vestan af Melbourne. Lögreglan segir óljóst hvort hann hafi verið á lífi þegar eyrun voru skorin af. Þó að kóalabirnir séu ekki í útrýmingarhættu er stofn þeirra sagður viðkvæmur. Talið er að fjöldi þeirra í náttúrunni nái ekki 100 þúsund dýrum.

Haft er eftir lögreglunni á vef breska ríkissjónvarpsins að málið sé óhugnanlegt og að það sé rannsakað í samhengi við fleiri dráp á þessu ári.

Er í því samhengi vísað til kengúru sem skotin var í hausinn í Melbourne í júní. Hafði hún verið bundin við stól og áfengisflösku komið fyrir á hræinu. Þá hafa fundist hræ vallabía sem einnig virðast hafa drepist af mannavöldum.

Lögreglan hefur biðlað til almennings um upplýsingar sem kunna að varpa ljósi á málin.