„Ef ég er að fá ráðherrastól af því ég er kona þá er miðaldra karlmaðurinn að fá stólinn af því hann er miðaldra karlmaður“

Þórdís Kolbrún R. Gylfadóttir, ferðamála- iðnaðar- og nýsköpunarráðherra segist biðja um að vera dæmd af eigin verkum en ekki vegna þess að hún sé unga konan í nýrri ríkisstjórn. Þórdís er 29 ára gömul og er yngsta konan til að gegna ráðherraembætti á Íslandi.

Hún segir jafnframt að Haraldur Benediktsson, oddviti sjálfstæðisflokksins í Norðvesturkjördæmi hafi sjálfur lagt til að hún fengi ráðherrastól og vísar því á bug að honum hafi fundist litið framhjá sér. Þórdís Kolbrún var í viðtali við Bítið í Bylgjunni í gær.

„Ég ákvað að fara í prófkjör og vonaði auðvitað að það myndi ganga þannig að ég kæmist á þing. Og það gekk. Þannig að mér fannst nógu stórt skref að taka ákvörðun um það að vilja verða alþingismaður. Þegar hann sagði að hann ætlaði ekki að leita út fyrir þingflokkinn þá varð ég hugsi. Ég hélt hann myndi gera það en var mjög ánægð með að hann gerði það ekki vegna þess að í þingflokknum er fullt af flottum konum,“ segir Þórdís um val Bjarna Benediktssonar, formanns Sjálfstæðisflokksins á ráðherrum í nýrri ríkisstjórn.

„Þetta kom mér á óvart. ÉG vissi að það gæti alveg eins verið ég eins og hver annar og ég nálgaðist hann þannig og fór yfir það hvaða reynslu ég hef og þá mannkosti sem ég teldi að myndu gagnast í þessu starfi. En þetta er ákvörðun hans og forystunnar og svo þingflokksins.“

En það voru ekki allir ánægðir með þessa uppstillingu

„Nei nei. Það kom fram í gær hjá honum Páli Magnússyni. Haraldur sem er oddviti í mínu kjördæmi, Haraldur Benediktsson, hann lagði þetta til meðal annars við formanninn og þeir ræddu þetta saman. Hann nefndi það sérstaklega, kom því á framfæri við þingmenn að hann væri mjög sáttur við þetta. Haraldur er náttúrulega einstakur maður og mikill liðsmaður.“

Sjá einnig:Páll studdi ekki ráðherraskipan: Lítilsvirðing gagnvart Suðurkjördæmi

Þórdís Kolbrún bendir einnig á að hún hafi fengið góða kosningu í sínu prófkjöri og að mikilvægt sé að landsbyggðin hafi fulltrúa í ríkisstjórn.

„Ég fór í prófkjör og óskaði eftir öðru sæti, fékk það og fékk flest greidd atkvæði í kjördæminu. 75 prósent þeirra sem tóku þátt settu mig á lista, þannig að mér gekk mjög vel í mínu prófkjöri. Talandi um svona kvóta og svona þá eru auðvitað hinir flokkarnir tveir sem eru með okkur í ríkisstjórn, þeir eru meira á höfuðborgarsvæðinu þannig að það var auðvitað mikilvægt að einhverjir kæmu inn í ríkisstjórnina af landsbyggðinni.“

Hún bendir á að tímarnir hafi breyst og að áður hafi almennt bara karlmenn verið í stjórnmálum.

„Sjálfstæðisflokkurinn hefur sagt að hann vilji hafa sem jöfnust hlutföll. Við erum ekki með skrifaðan kynjakvóta eða fléttulista eða þess háttar þannig að það er litið til þessara þátta eins og annarra. Ef maður hugsar hvernig það var áður fyrr þá var kannski ekki verið að horfa á að það væri mikilvægt að hafa konur, enda voru þetta almennt þá bara karlmenn. Það var ekki þessi sama eftirspurn eftir því að fá svona ungt fólk í bland við eldra og reynslumeira fólk. Þá var litið til þeirra þátta eins og af hvaða svæði menn komu og reynslunnar og bakgrunns og til hvaða fólks þessir einstaklingar eru að tala og svona.“

Mikilvægt að ríkisstjórnin endurspegli samfélagið

Þórdís segir það jafnframt ekki maklegt að segja að hún hafi fengið ráðherrastól vegna þess að hún sé kona.

„Ég var spurð að þessu í gær og ef við tökum mig bara sem dæmi, ef ég er að fá ráðherrastól af því ég er kona þá er miðaldra karlmaðurinn að fá stólinn af því hann er miðaldra karlmaður. Það er auðvitað augljóst að formaðurinn skipar eins sterkt lið og hann telur sig mögulega geta gert. Meðal annars þannig að, við erum í vinnu líka hjá kjósendum og við þurfum að geta talað við kjósendur og hópurinn þarf að geta endurspeglað samfélagið.“

Þórdís biður um að vera dæmd af verkum sínum.

„Auðvitað er verið að tala um að það skipti máli að geta gert hlutina vel og svona en þá biður maður líka um það að vera dæmdur af verkum sínum en ekki að segja að ég sé unga konan sem var tekin með. Ég var tekin vel af því að fólk trúir því að ég geti gert hlutina vel.“

Ekki bara því þú ert ung kona?

„Nei að sjálfsögðu ekki.“

Hægt er að hlusta á viðtalið í heild sinni í spilaranum hér fyrir neðan.