Jafnt á heimavelli hjá Kiel

Lærisveinar Alfreðs Gíslasonar hjá Kiel leiddu lengst af en þurftu að sætta sig við 20-20 jafntefli gegn Flensburg í B-riðli Meistaradeildar Evrópu í handbolta í dag.

Varnarleikurinn var í fyrirrúmi framan af í leiknum og var staðan aðeins 2-2 eftir rúmlega tíu mínútna leik í Sparkassen-Arena, heimavelli Kiel.

Heimamenn áttu góða rispu eftir það og náði um tíma fimm marka forskoti í stöðunni 8-3 en Flensburg náði að laga stöðuna og var staðan 9-7 í hálfleik, Kiel í vil.

Gestirnir í Flensburg náðu eina forskoti sínu í leiknum í upphafi seinni hálfleiks í stöðunni 11-10 en Kiel náði forskotinu á ný fljótlega.

Leiddu þeir það sem eftir lifði leiks en Flensburg voru aldrei langt undan og náðu þeir að jafna metin á lokamínútunni sem dugði þeim til þess að taka stig úr leiknum.