Bótalaus stuldur í Bryggjuhverfi

Eigandi báts, sem varð fyrir því að utanborðsmótor bátsins var stolið, á ekki rétt úr bótum fjölskyldutryggingar sinnar vegna tjóns af völdum þjófnaðarins. Ástæðan er sú að mótorinn var ekki geymdur í bílskúr eða læstri geymslu.

Bátnum hafði verið lagt á læstu svæði við Bryggjuhverfið í Reykjavík. Aðeins eigendur báta á svæðinu hafa lykla að því. Hins vegar er hægt að komast að svæðinu frá sjónum.

Vátryggingafélag mannsins hafnaði bótaskyldu þar sem tryggingin tók aðeins til tjóns á hlutum sem tilheyra vélknúnum skemmtibátum hafi þeir verið geymdir í bílskúr eða læstri geymslu.

Úrskurðarnefnd í vátryggingamálum féllst á að læsta svæðið teldist ekki slíkt svæði. Tjónið fæst því ekki bætt.