Erlent

Konan sem myrti nauðgara sinn og stjörnurnar vilja fá lausa úr fangelsi

Hulda Hólmkelsdóttir skrifar
Cyntoia Brown er 29 ára gömul í dag.
Cyntoia Brown er 29 ára gömul í dag. Wikipedia
Cyntoia Brown var sextán ára gömul þegar hún myrti mann sem keypti hana þegar hún var seld í vændi. Hún afplánar lífstíðardóm vegna málsins. Þrettán árum seinna vilja skærustu stjörnur Hollywood aðstoða Brown við að losna úr fangelsi.

Það var í ágúst árið 2004 sem Brown skaut Johnny Mitchell Allen til bana. Allen var 43 ára og hafði borgað fyrir kynmök með Brown. Málið hefur aftur ratað í fjölmiðla vestanhafs eftir að stjörnur á borð við Kim Kardashian, Rihönnu og LeBron James vöktu athygli á því.





Á unglingsárum sínum flúði Brown að heiman til Nashville í Tennessee. Þar hitti hún 24 ára gamlan mann sem er kallaður „Cut Throat.“ Þau byrjuðu að búa saman á hótelum en maðurinn misnotaði Brown, nauðgaði henni og neyddi hana út í vændi, að sögn lögmanna hennar. 

Daginn sem hún hitti Allen árið 2004 hafði Cut Throat sagt henni að fara út á götuhorn og koma til baka með peninga. Allen tók Brown upp í pallbíl og fór með hana heim til sín. Þegar þangað var komið sýndi hann henni hluta skotvopnasafns síns og fylgdi henni svo inn í svefnherbergi.

Hrædd um að vera nauðgað og myrt

Samkvæmt Brown teygði Allen sig undir rúmið á einum tímapunkti og hélt hún að hann væri að leita að byssu svo hún náði sjálf í byssu í veskið sitt og skaut hann. Einnig rændi hún peningum og tveimur byssum af Allen. Saksóknarar í málinu töldu ránið hafa verið aðalásetning Brown en hún heldur fram að um sjálfsvörn hafi verið að ræða. 

„Þegar hún var á heimili hans, eftir að hafa verið keypt fyrir kynlíf, sýndi hann henni töluvert af vopnum sem hann átti svo hún hélt að hún yrði myrt auk þess að vera nauðgað,“ sagði Charles Bone, lögmaður Brown, í samtali við NBC.

Réttað var yfir henni sem fullorðnum einstaklingi og þrátt fyrir að hafa borið fyrir sig sjálfsvörn var hún dæmd sek fyrir morð af fyrstu gráðu. Brown er í dag 29 ára og getur sótt um skilorð eftir 40 ár, þegar hún verður 69 ára.

Baráttufólk fyrir málstað Brown segir hana hafa verið fórnarlamb mansals og að dómurinn yfir henni hafi verið of þungur miðað við aldur hennar og aðstæður. Meðal þeirra sem hafa tjáð sig opinberlega um mál Brown síðustu viku eru fyrirsætan Cara Delevigne og rapparinn Snoop Dogg.

Kim Kardashian West er ein þeirra sem hefur lagt málstaðnum lið og hefur hún gengið svo langt að bjóða fram aðstoð lögfræðinga sinna í málinu.

„Cyntoia er slegin og hissa á því hve margar stjörnur hafa skyndilega ákveðið að þau þurfi að vekja athygli á þessu. Hún er mjög þakklát fyrir áhuga þeirra, áhyggjur og stuðning,“ sagði Charles Bone.

Ítrekað hefur komið fram, meðal annars í umfjöllun fjölmiðla, heimildarmynd um málið og í gögnum málsins, að Cyntoia hafi verið með einkenni áfengisheilkennis fósturs. Árið 2012 komust læknar að því að hún væri með vefræna geðröskun.

Síðan dómur féll yfir Brown hafa nokkrar tilraunir verið gerðar til að sækjast eftir endurupptöku á máli hennar. Lögmaður hennar telur að ef hún yrði dæmd eftir núverandi lögum í Tennessee ríki yrði hún dæmd fyrir annarar gráðu morð og gæti sótt um skilorð á næstu árum, þegar hún hefur afplánað 15 ár af dómi.

„Munurinn á 15 árum og 51 ári er heil mannsævi fyrir manneskju eins og Cyntoiu“ segir hann.

Þessi grein er byggð á umfjöllun The Guardian, NBC og CNN.

Mest lesið


Fleiri fréttir

Sjá meira


×

Mest lesið