Sendu hjálpargögn til barna í nafni 624 íslenskra fyrirtækja

Tugþúsundir hjálpargagna hafa verið send til bara um víða veröld í nafni 624 íslenskra fyrirtækja. Landsbankinn gaf þrjár milljónir króna í þeirra nafni með sönnum gjöfum hjá UNICEF. Þannig vildi Landsbankinn óska þeim fyrirtækjum sem hlutu viðurkenningu Creditinfo fyrir framúrskarandi árangur í rekstri til hamingju.

Þetta er stærsta einstaka pöntunin hjá UNICEF frá upphafi.

„Við erum innilega þakklát fyrir þetta ótrúlega rausnarlega framlag,“ segir Bergsteinn Jónsson, framkvæmdastjóri UNICEF á Íslandi, í tilkynningu.

„Það er gleðilegt til þess að vita að börn vítt og breitt um heiminn fái nú hjálpargögn sem gefin voru í nafni fjölmargra fyrirtækja á Íslandi. Við þökkum Landsbankanum hjartanlega fyrir og óskum fyrirtækjunum öllum sem fengu viðurkenninguna til hamingju með árangurinn.“

Sannar gjafir UNICEF eru lífsnauðsynleg hjálpargögn fyrir bágstödd börn og er ætlað að bæta líf barna um allan heim.

Að sögn Völu Karenar Viðarsdóttur, fjáröflunarfulltrúa hjá UNICEF á Íslandi, voru hjálpargögn af öllum stærðum og gerðum í sendingunni frá Íslandi. Í henni voru:

95 moskítónet sem gegna lykilhlutverki í baráttunni gegn malaríu

1.070 hlý teppi fyrir börn á flótta

8.550 skammtar af næringardufti fyrir vannærð börn

8.770 pakkar með námsgögnum

9.030 skammtar af vítamínbættu jarðhnetumauki fyrir vannærð börn

12.550 skammtar af bóluefnum gegn mænusótt og mislingum

49.000 skammtar af ormalyfi sem vinnur bug á sníkjudýrasýkingum

95.000 vatnshreinsitöflur

„Við höfum aldrei fengið jafnstóra pöntun af sönnum gjöfum og erum hæstánægð með þetta,“ segir Vala. „Gjöfunum verður nú dreift til barna og fjölskyldna þeirra með milligöngu birgðastöðvar UNICEF. Framtakið hjá Landsbankanum er frábært og mun sannarlega koma í afar góðar þarfir.“