Erlendur Eurovision-fræðingur fer yfir slakt gengi Íslands í Eurovision síðustu ár

„Það er erfitt að setja fingur á það,“ segir Gil Laufer, fréttastjóri Eurovision-vefsins ESC Today, þegar hann er spurður hvers vegna Íslandi hefur mistekist þrjú ár í röð að komast í úrslit Eurovision.

Gil Laufer er 24 ára gamall Ísraelsmaður sem býr nú í Svíþjóð. Hann hefur fylgst með Eurovision-keppninni frá árinu 1999 og hefur verið hluti af ritstjórn ESC Today frá árinu 2008.

Einn þeirra sem var ekki hrifinn af Paper

Hann var einn þeirra blaðamanna sem voru ekki ánægðir með atriði Svölu þegar hún hafði lokið við fyrstu æfingu sína í Kænugarði í Úkraínu í síðustu viku og greindi frá niðurstöðu kosningu blaðamanna í beinni útsendingu á Facebook-síðu ESC Today og fór yfir það sem honum fannst vanta upp á varðandi atriði Íslendinga. Sögðu blaðamennirnir það afar ólíklegt að Ísland yrði á meðal þeirra þjóða sem yrðu í úrslitum í ár og höfðu þeir rétt fyrir sér í þetta skiptið.

Vísir hafði samband við Gil og spurði hann hreint út hvað það er sem við Íslendingar gerum rangt sem hefur orðið til þess að við höfum ekki komist í úrslit Eurovision síðastliðin þrjú ár.

„Það virðist vera að öll þrjú síðust lög Íslendinga hafi verið nokkuð lík þegar kemur að tegund tónlistar og yfirbragði. Þau hafa fært drungalega tóna norðursins á Eurovision-sviðið, þó að lagið árið 2015 hafi ekki verið jafn drungalegt og síðustu tvö,“ segir Gil sem á þar við lögin Unbroken árið 2015, Hear Them Calling árið 2016 og Paper í ár.

Var hissa á gengi Íslands í fyrra

Hann segir það hafa komið mörgum á óvart að Greta Salóme hafi ekki farið áfram með lag sitt Hear Them Calling í fyrra.

„En niðurstaðan í ár var fremur viðbúin. Þrátt fyrir að lagið hafi verið flutt afburða vel þá var sviðsetningin of einföld og lagið ekki nógu grípandi.“

Smæð Íslands hefur ekki úrslitaáhrif

Spurður hvort að smæð íslensku þjóðarinnar hafi eitthvað að segja, það er að Íslendingar eru ekki eins dreifðir um Evrópu líkt og aðrar þjóðir og eigi sér þar með ekki jafn öfluga bandamenn þegar kemur að kosningunni, segir Gil það vissulega hjálpa til að hafa atkvæði vís víðs vegar um Evrópu en það hafi þó ekki úrslita áhrif.

„Ísrael er til dæmis hinu megin við álfuna, án nágranna og ekki dreifðir um Evrópu líkt og stærri þjóðirnar. Ísraelsmenn komast hins vegar í úrslit þegar þeir ná að blanda saman góðu lagi og flutningi.“

Í grein breska dagblaðsins Telegraph frá því í fyrra kom fram að Íslendingar séu langt því frá að vera vinalausir þegar kemur að Eurovision, því við tilheyrum einu af þremur stærstu kosningabandalögum Eurovision.

Stærstu kosningabandalögin eru:

• Balkanlöndin – löndin sem áður tilheyrðu Júgóslavíu ásamt Rúmeníu og Albaníu.
• Sovétríkin fyrrverandi og leppríki þeirra í Austur Evrópu. 
• Skandinavía – En þar telur Telegraph upp Svíþjóð, Danmörk, Noreg, Finnland, Ísland ásamt Litháen og Lettlandi.

Mikill aðdáandi Laugardagslaganna

Hann segist hafa verið mikill aðdáandi Laugardagslaganna árið 2008. Um var að ræða skemmtiþátt sem stóð yfir í fimm mánuði þar sem áhorfendur völdu framlag Íslendinga í Eurovision úr lögum sem voru eftir höfunda sem höfðu sent inn lög, og höfunda sem voru sérstaklega fengnir til að semja lag fyrir keppnina.

Í heildina voru 33 lög sem kepptu, keppnin hófst 6. október árið 2007 og endaði með úrslitakvöldi 23. febrúar árið 2008 þar sem Eurobandið hafði sigur með laginu This Is My Life.

Á þessum tíma höfðu Íslendingar aldrei komist í úrslit Eurovision eftir að undanriðlafyrirkomulaginu var komið á. Selma Björnsdóttir fór með lagið If I Had Your Love í Eurovision árið 2005 en komst ekki áfram, Sylvía Nótt fór árið 2006 með lagið Congratulations en komst ekki áfram og Eiríkur Hauksson fór með Valentine Lost árið 2007 og komst heldur ekki í úrslit.

Það var Eurobandið sem braut ísinn og kom Íslandi í úrslit Eurovision árið 2008 og tóku við eftir það sjö ár í röð þar sem Ísland komst í úrslit.

„Laugardagslögin árið 2008 var ein af mínum uppáhalds undankeppnum því lögin voru svo fjölbreytt. Síðustu ár hefur Ísland sent lög sem ég kýs að kalla Spotify-smelli: Afslappaða grípandi tóna sem er ágætt að hlusta á, alveg eins og Paper. Það sem virkaði fyrir 10 árum mun örugglega ekki virka núna, því það senda allir slík lög í dag í keppnina,“ segir Gil og rekur það til ársins 2016, árið eftir að Svíar unnu keppnina með lagið Heroes.

„Það þarf meira til að skara fram úr,“ segir Gil. Jóhanna Guðrún náði öðru sætinu með lagið Is It True? árið 2009 en Gil segist ekki svo viss að það lag myndi ná öðru sæti í dag.

Vill sjá meiri frumleika

Hann segir Söngvakeppni Sjónvarpsins í fínu lagi, en vill sjá meiri frumleika og lög sem eru nýstárleg.

„Það gæti hjálpað að syngja á íslensku, en það þarf ekki að vera algilt. Íslenska er töfrandi tungumál og ætti að nota hana sparlega í þessari keppni.“ segir Gil. Eyþór Ingi Gunnlaugsson söng lagið Ég á líf á íslensku í Eurovision árið 2013 og fór með lagið í úrslit keppninnar.

Ef horft er í söguna þá ætti Ísland að eiga sæti víst í úrslitum Eurovision á næsta ári og þá muni fylgja mikið „gullaldartímabil“ þar sem við eigum sæti í úrslit víst ár eftir ár. Hver niðurstaðan verður á næsta ári verður hreinlega að koma í ljós þá.