Smástirni þýtur á milli jarðarinnar og tunglsins í október

Vísindamenn segja að engin hætta verði á ferðum þegar smástirni á stærð við hús þýtur fram hjá jörðinni 12. október. Smástirnið fer langt inn fyrir braut tunglsins en aðeins utar en fjarlægustu gervitunglin á braut um jörðu.

„Við vitum fyrir víst að það eru engar líkur á að fyrirbærið rekist á jörðina. Það er ekki nokkur hætta,“ segir Detlef Koschny sem starfar við teymi Evrópsku geimstofnunarinnar (ESA) sem fylgist með fyrirbærum í grennd við jörðina.

Smástirnið, sem hefur fengið nafnið 2012 TC4, verður í 44.000 kílómetra fjarlægð þegar það fer fram hjá jörðinni. Það er aðeins einn áttundi af fjarlægðinni á milli jarðarinnar og tunglsins. Sístöðugervitungl eru í um 36.000 kílómetra fjarlægð, að því er segir í frétt á vefnum Phys.org.

Vísindamennirnir áætla að smástirnið sé 15-30 metrar að lengd en það ferðaðist á um fjórtán kílómetra hraða á sekúndu þegar þeir komu auga á það. Það er rúmlega 50.000 km/klst.

ESA segir í yfirlýsingu að heimsókn smástirnisins sé tilvalið tækifæri til að reyna á getu þjóða heims til þess að fylgjast með fyrirbærum sem nálgast jörðina og meta getuna til að bregðast við raunverulegri hættu af smástirnum.