Yfirlýsing frá Liverpool: Hundrað prósent öruggt að Coutinho verði áfram hjá Liverpool

Eigendur Liverpool hafa nú sent frá sér skýra og skorinorða yfirlýsingu vegna allra frétta enskra og spænskra miðla um hugsanlega kaup Barcelona á brasilíska leikmanninum Philippe Coutinho.

Knattspyrnustjórinn Jürgen Klopp hefur allan tímann talað hreint út en nú er endanlega ljóst að eigendurnir eru algjörlega sammála honum í þessu máli.

„Við viljum greina frá ótvíræðri afstöðu okkar gagnvart mögulegum félagsskiptum Philippe Coutinho.

Félagið er ákveðið í því að við munum ekki skoða neina tilboð í Philippe og að hann verður áfram leikmaður Liverpool þegar sumarglugginn lokast,“ segir í yfirlýsingunni sem má nálgast hér fyrir neðan.

Enskir og spænskir fjölmiðlar hafa skrifað mikið um áhuga Barcelona á Philippe Coutinho sem átti að fylla í skarð Neymar sem var seldur fyrir metfé til franska liðsins Paris Saint Germain.

Philippe Coutinho er 25 ára gamall og gríðarlega mikilvægur leikmaður í sóknarleik Liverpool. Hann var með 13 mörk og 7 stoðsendingar í 31 leik í ensku úrvalsdeildinni á síðasta tímabili og hefur aldrei skorað meira á tímabili eða gefið fleiri stoðsendingar.

Coutinho kom til Liverpool frá ítalska félaginu Internazionale í ársbyrjun 2013 og hefur vaxið og dafnað hjá félaginu síðan.